Segun encuesta 58% di bishitante ta haya cu Aruba a bira mucho caro

ORANJESTAD – Encuesta cu Aruba Tourism Authority (ATA) a haci e ultimo aña cerca nos ‘bishitantenan’ (turista), ta mustra cu 58% di esnan encuesta, ta haya cu Aruba a bira mucho caro. Asina CEO di Aruba Hotel & Tourism Association (AHATA) Tisa LaSorte a bisa den un conferencia di prensa recien. A mustra cu for di 2013 nan ta registrando e aumento di impuesto y esaki no a baha. E miedo ta cu lo yega e momento zero cu e turista ta considera Aruba ‘mucho caro’ y ta busca otro opcion. 

TIPPING POINT

LaSorte ta yama e momento cu e turista ‘dicidi’ cu nos isla ta mucho caro pa nan sigui bin Aruba, un tipping point. E no sa scientificamente kico e tipping point lo ta, esta na ki momento e turista ta bisa cu ‘ta basta’. E ta un peliger si segun LaSorte esta e aumento di gasto y e tipping point, y nos mester percura pa esaki no sosode. 

CORIENTE Y IMPUESTO

LaSorte a referi brevemente tambe na e noticia cu prijs di coriente lo baha otro aña. Mientras cu e ta contento di e noticia positivo aki, el a compronde cu esaki ta solamente pa un aña. Y por bien ta cu despues e prijs ta subi doble. E problema segun LaSorte, ta cu en cambio un impuesto nobo no ta baha. Ora cu introduci reforma basa riba impuesto nobo of mas halto, e ta algo cu nos ta bay keda cu ne pa semper. “ Esey ta e peliger”. LaSorte ta sigui bisa.