AHATA: Un reunion cu gobierno no ta suficiente pa tin participacion real

ORANJESTAD – Un reunion (so) no ta bastante pa tin participacion real. Asina CEO di Aruba Hotel & Tourism Association (AHATA) Tisa LaSorte a bisa recientemente riba e situacion entre gobierno y gremionan commercial. E tema ta cambionan fiscal cu ta na caminda, pero cu segun e.o. AHATA, no ta hayando participacion ‘real’ di parti di gobierno. Segun LaSorte, gobierno no mester tene un reunion (so) anto demonstra manera cu esey ta e participacion cu lo mester tin. E CEO ta mustra cu cambionan mester bin hunto, y yega na solucion pa nos isla. 

SIGUR

Segun LaSorte, e motibo pa tin participacion real, ta pa gremionan ta sigur cu e decisionan cu wordo tuma, ta duradero y no ta perhudica ni e consumidor ni comercio di un manera cu bo ta stagna nos economia. “Ni cu nos turismo ta haya nan mes cu problema cu e turista ta haya Aruba mucho caro”. “Si nos por traha riba solucionan hunto, nos tin miho oportunidad pa tin solucion cu ta duradero y positivo pa nos isla den un manera di duracion largo. 

MIEDO

E miedo di AHATA ta cu decisionan ta wordo tuma cu tin un injeccion financiero a plazo cortico, pero cu esey no ta e solucion pa algo duradero. E falta di participacion ta algo cu mester cambia. Segun LaSorte, AHATA tin varios aña ta papia di e gastonan cu ta hisando. A haci un lista na AHATA desde 2013 cu ta impuestonan cu ta keda subi y e impuestonan cu ta keda introduci pa comercio. Esey semper tin un efecto directo riba turismo en general y consumidornan. Falta di informacion ta pone cu tin mucho nervio pa inverti y mucho nervio cu no tin suficiente cup di trabou.