ATIA: Preocupa cu gobierno lo pasa cambio fiscal sin consulta cu gremionan

ORANJESTAD – E gremio comercial Aruba Trade & Industry Association (ATIA) tin miedo cu gobierno di Aruba lo pasa cambionan fiscal na cambio di aña awor  sin consulta cu gremionan di Aruba. Asina su directora Michelle de Groot a vocifera den un conferencia di prensa. Segun de Groot, faltando apenas algun siman pa aña 2019 termina, ainda no tin nada official di parti di gobierno di kico e cambionan fiscal aki ta bay ta pa 2020. Intento pa haya feedback di gobierno, no ta resultando tampoco. Pesey a ‘bati e bel di alarma via prensa, pa haya atencion di gobierno. 

REUNIONAN

Segun de Groot, berdad tabatin reunionan recien cu a tuma lugar pero cu no a desemboca den follow up manera a keda pidi. Reunionan cu stakeholders dia 4 y 5 di September a tuma lugar, unda cu a presenta proposicion pa introduci cierto cambio (sugar tax ta un di nan). A keda di manda follow up pero te cu awe, esaki no a sosode. Ta den media a bin compronde cu no ta introduci sugar tax ni e asunto di royalties. Un reunion despues cu tanto minister di finanza y despues premier (dianan 12 y 14 di November respectivamente) tampoco a resulta den follow ups. 

INCERTIDUMBRE

A mustra cu comercio ta bibando den un incertidumbre grandi afectando nan grandemente. “No ta durf haci inversionnan , no ta durf crea mas cupo di trabou etc”. E falta di comunicacion, di envolvimento, ta preocupante y a pidi gobierno pa sinta cu ATIA, y no tuma decision sin envolvi sector priva. “Nos ta willing pa traha cu nan, pa wak kico ta e miho manera. Nos no sa aworaki kico ta biniendo” de Groot a finalisa bisando.