Grupo di gremio comercial kier participacion real cu gobierno

ORANJESTAD – AHATA y otro gremionan commercial manera AFBA, ATSA y Camara di Comercio no ta nada contento cu e trato cu nan ta hayando di gobierno. E cuater gremionan a vocifera nan malcontento diabierna pa cu e relacion cu tin cu gobierno riba e asunto di reforma fiscal. Papiando pa AHATA, su CEO Tisa LaSorte a mustra cu nan kier ‘participacion real’, y no tene reunion sin contenido y despues bisa cu ta papiando solamente. Segun LaSorte, casi no tin comunicacion cu gobierno riba e tema, y nan tin miedo di haya sorpresa ora cu aña bolter y cu gobierno presenta medidanan nobo cu nan mester atende cu ne. 

REACCION MINISTER

A bisa riba pregunta di Noticiacla.com cu berdad gobierno a reuni cu nan na September, pero cu no tabatin followup. Minister Maduro (Finanza y Economia) a sigura e portal aki cu tin reunion cu e gremionan y cu debidamente a tene cuenta cu nan preocupacion y cu esey ta e.o. e motibo cu no tin sugar tax y tampoco e asunto di cobra royalties. Pues e ponencia di e gremionan no ta corecto. AHATA y e otro gremionan ta papia otro palabra, y cu mester tin mas participacion, y real, cu contenido y cu ta duna gremionan e oportunidad pa bin cu sugerencia. Cartanan no ta haya contesta, y asina cos no por sigui. A mustra cu tin un tin mucho miedo pa inversionistanan inverti, y tambe cu cualkier gasto extra ta bira un peso tambe pa e turista cu ta bishita Aruba. 

KVK

Di parti di Camara di Comercio, su presidente Kawish Misier ta bisa cu no por papia di reforma fiscal sino mas bien simplemente aumento di gasto. A recorda con aña pasa a pasa ley na cambio di aña, ‘perhudicando comerciante’. Segun Missier, gobierno mester ta mas husto, y mester ta mas transparente. A mustra cu no sa kico e fase 2 lo contene mes, y tin miedo cu historia ta ripiti atrobe e biaha aki. 

AFBA

E presidente di Aruba Food & Beverage Association, Jan van Nes a mustra cu ta preocupa cu e situacion unda cu tin inversionistanan cu tabata cla pa inverti pero ora a keda confronta cu e situacion na Aruba, a opta pa ‘back off’ y no inverti mas. Ora cu a puntra van Nes pa informacion mas detaya, van Nes a sigura e portal aki cu e tin conocemento di un lista di inversionista, cu a laga sa cu e ‘set back’ cu nan a confronta na Aruba pa cu e.o. e redtape, a pone cu nan a opta pa no inverti mas na Aruba. Algo cu sigur ta preocupante segun e presidente di e gremio di alimento y bebida. 

ATSA

Presidente di e asosacion di hotelnan TimeShare (ATSA),Luigi Heredia, a mustra cu manera cu ta conoci, e sector hotelero ta traha por lo menos un aña delanta, ta traha dealnan cu turista, y cu cosnan cu bin aworaki, lo crea gasto extra cu turistanan no ta spera. A duna como ehempel e hecho cu turistanan ya caba pa 2020 a paga nan suma di mantenimiento y otro gastonan cu ta presupuesta delanta. Pues no por bin cu gastonan extra mas riba nan, pasobra esaki lo solamente perhudica esaki. Hotelnan ta presupuesta 6 pa 9 luna delanta y cualkier cambio economico, tin su efecto.