A cancela reunion urgente di Parlamento pa Serlimar haya placa

ORANJESTAD – Un reunion urgente den commission central di Parlamento pa e compania Serlimar haya fondo urgente, a keda posponi te proximo aviso. Asina griffier a manda bisa diabierna mainta. E intencion tabata pa pidi Parlamento aprobacion pa e suma di 800 mil florin urgente, pa paga ‘obligacionan a corto plazo’, cu ta referi na e.o. salario. Esaki pasobra e.o. e ley di Serlimar pa garantisa extra fondo, no a keda pasa. Ademas e suma extra presupuesta di 2 miyon florin cu ta den e asina yama ‘najaarsnota’, ainda no ta aproba, pasobra e ta pega na Raad van Advies. “Pero e situacion na Serlimar ta di tal urgencia cu riba e suma di 2 miyon, (Serlimar) mester tin un suma adicional di 800 mil florin. A pidi pa e reunion tuma lugar diabierna y esaki a keda yama ultimo ora. Sinembargo despues a bira conoci cu ta ‘pospone e reunion’. Pues mes lihe cu a yama e reunion, esaki a keda posponi. No ta conoci ki fecha awor lo keda poni y kico esaki ta nifica pa e trahadonan di Serlimar. 

MEMO

E siman aki ainda un memo interno a ‘leak’ riba social media, unda cu director di e compania Serlimar ta sigura trahadonan cu otro siman e pago ta tuma lugar pa e trahadonan di e compania. Algo cu mester ta normal, pero parse cu e pago normalmente lo mester a tuma lugar e siman aki, pero pa e motibonan conoci, esaki awor ta sosode otro siman. Pero, mirando cu e reunion no a tuma lugar ainda y no tin fecha, esaki por bira un problema ainda aunke tin tempo ainda pa resolve tur asunto.