Minister Oduber ta desea pa hunta di supervision di HOH retira

ORANJESTAD - Minister di Salud Dangui Oduber ta desea pa hunta di supervision di HOH retira. Kier, pasobra e ta na altura cu e no tin e autoridad pa retira e hunta. Como tal el a opta pa manda e mensahe aki (un biaha mas). Den un mensahe, el a indica esaki diabierna. Segun e mandatario, a yega momento pa e Raad van Toezicht di Hospital reflexiona si nan ta apto pa keda forma parti di e hunta di supervision aki. Ademas, un biaha mas, e tambe kier pa director di hospital bay, esta Ezzard Cilie. 

DECEMBER 

For di aña pasa december, a kita e director financiero di hospital, Theo de Kool. Na momento cu Raad van Toezicht a tuma e decision aki, a splica nan si nan tin suficiente base pa termina e contracto laboral di e director financiero, percura pa tin un backup plan. A pidi pa tin un wervingselectie, percura pa busca un reemplasante pa de Kool, kende a wordo retira na aña pasa december y ya caba a cumpli un aña di esey.

LAMENTO

Minister di Salud Publico, Dangui Oduber, ta lamenta esaki y e ta haya ta iresponsabel pa Raad van Toezicht no a yena e vacatura aki. Pa un organisacion di mas di mil trahado, un director financiero ta un funcion sumamente importante den henter e organisacion.

REEMPLAZANTE PA CILIE

Ta mesun caso cu tin cu e director medico cu ta sr. Cilie, kende na e momentonan aki ta e unico persona cu ta forma parti di Raad van Bestuur. Su contracto ta termina awo na december y na ningun momento a tuma un iniciativa pa busca un reemplasante.

SITUACION FOR DI CONTROL

Por mira e situacion cu tin na hospital, unda cu e situacion no ta den control. Un aña a pasa y ainda no tin un persona y no a busca un reemplasante pa Cilie. Na e momentonan aki mester busca un director financiero. Na mes momento busca un reemplasanta pa Cilie. Ta yega e momento pa cada miembro di e hunta di supervision aki, reflexiona kico ta nan responsabilidad pa loke ta salud publico.

SIGUI FORMA PARTI DI E HUNTA

No reflexiona kico ta nan tarea pa haci pa gobierno di Aruba, sino kico ta nan tarea den nomber di e comunidad aki. Kico nan ta haciendo pa percura pa tin un hospital manera mester ta, cu ta funciona optimalmente pa percura cu e cuido por wordo garantisa na tur momento, pa tur e funcionnan clave ta yena y nan reflexiona pa si nan ta apto pa keda forma parti di e hunta di supervision aki. Segun e mandatario, ‘e momento a yega pa nan tene honor na nan mes!’.