Ta distribui plachi di number nobo di auto te maart 2020

ORANJESTAD – Diahuebs noticiacla.com a raporta caba cu e color di e plachinan di number ta conoci pa 2020, y ta blanco y cora. Adicionalmente, ta bira conoci awor cu contrario na añanan anterior, plachi di number di auto nobo no ta wordo entrega na comienso di aña, pues januari di e aña corespondiente, sino te na maart 2020. Esaki pasobra segun informacion cu noticiacla.com a haya, ta trata di un cambio cu DIMP ta introduci, y kier haci e logistica diferente. Di otro banda, e plachinan di nomber (“naamplaten”) si lo ta disponibel caba despues di dia 10 di januari 2020.

PROCESO

E contribuyentenan cu ta desea un plachi di nomber (“naamplaat”) (cliente nobo) mester registra e plachi dia 3 di januari 2020 y haci e pago corespondiente na Departamento di Impuesto mes. Despues di pago, e contribuyente lo ricibi un carta, cual e lo entrega na e compania indica pa laga traha e plachinan. Lo avisa e contribuyente ki dia e lo por pasa busca su plachinan.

CONTRIBUYENTE CU TIN PLACHI CABA

E contribuyentenan cu ya caba tin un plachi di nomber (“naamplaat”), por haci pago na Departamento di Impuesto of banco. E contribuyentenan cu a paga via banco lo mester busca e carta na e oficina anexo di Departamento di Impuesto na Camacuri. Ora di busca e carta, e contribuyente mester mustra e comprobante  di pago di banco, pa asina e haya un printout di e recibo original di Departamento di Impuesto. Despues e ta entrega e carta aki na e compania indica cu ta bay traha e plachinan.

PLACHI DELANTA

Mester remarca cu Departamento di Impuesto no ta bay laga traha e plachinan di nomber delanta. Despues cu e cliente haci e pago di impuesto, e ora lo bay duna e carta cu e ordo pa laga traha e plachinan di nomber.