Rhuggenaath: Tin suficiente gasoline na Corsou pa tres luna largo

Rhuggenaath: Tin suficiente gasoline na Corsou pa tres luna largo

Posted on 12/12/2019 5:24 pm AST | Updated on 12/12/2019 5:25 pm AST

WILLEMSTAD – No tin motibo di panico y gobierno di Corsou ta ‘on top of it’, pa loke ta e situacion actual na Corsou. Por lo menos, esey tabata e mensahe di prome minister di Corsou Eugene Rhuggenaath diahuebs merdia den un conferencia extraordinario cu e tema: Situacion na Corsou. E situacion tanto riba e situacion di Girobank y e tension cu tin na refineria Isla. Rhuggenaath a sigura Corsou cu no mester tin panico, pasobra tin suficiente gasoline y ta reuniendo cu sindicato, banco y Isla pa un solucion. 

GASOLINE

For di momento cu sindicato di trahadonan di refineria ISLA, esta PWFC a cuminsa preocupa riba e tema di salario, a cuminsa menasa cu accion cu lo mester e.o. resulta den posibel problema cu suministro di gasoline segun e presidente di e sindicato diahuebs mainta den un entrevista cu Telecuracao. A cuminsa un core core di hendenan pa pompnan di gasoline pa miedo cu nan lo por keda sin gasoline. Rhuggenaath sinembargo a sigura cu tin gasoline reserva pa por lo menos 3 luna, pues no tin cu rush bay ningun pomp cu miedo cu bo lo keda sin gasoline. 

PLACA

Tambe e mandatario a purba trankilisa comunidad riba e tema di placa, unda cu a bisa cu ta reuniendo cu Banco Central pa wak con ta sali di e problemanan aki, y pa sigura cu tur hende por keda trankil cu nan lo por tin aceso na nan placa na e.o. Girobank. Otro banconan manera PSB a sigura cu nan tambe ta ok y cu no tin ningun problema pues rumornan ey di cu PSB tambe tin problema, ta complemente falso. Si e mandatario a logra trankilisa comunidad, no ta conoci. 

TENSION

Mientrastanto trahadonan di refineria tabata staciona na Post 7 na e refineria, varios cu cara tapa pa nan no wordo identifica, y ta supone cu ta pa en caso cu tin problema, no por identifica nan. Trahadonan ta mantene nan accion pues Isla ta plat, y no ta conoci si e accionan aki lo escala den e oranan nos dilanti. Potret cortesia Dick Drayer. 

  • Powered by SETAR