Otmar Oduber ta bay di minister pa consultant den ramo di turismo

ORANJESTAD – Di minister di infrastructura y medio ambiente, pa consultant riba tereno di turismo. Esey ta bira e carera ‘nobo’ di Otmar Oduber entrante diabierna awor. Asina e awor mandatario saliente a bisa noticiacla.com diahuebs mainta durante un desayuno di despedida pa prensa. E mandatario a splica cu e ta bay bek na su roots pa loke el a studia pe tambe y ta den su curason, cu ta turismo. E no ta estableci ainda pero unabez cu e retira, e proceso ta cuminsa pa lanta su consultorio pa e tereno ey. 

DESPEDIDA

Manera el a haci recientemente caba, Oduber a despidi diahuebs mainta di prensa tambe durante un mainta di desayuno na Hilton Hotel. “ Sea tabata pa entrevista, critica, discusion of colaboracion pa transmiti e informacion na comunidad. Comunicacion cu prensa ta un aspecto sumamente importante specialmente pa tur politico cu mester por tin e comunicacion habri aki” Oduber a bisa. “ Particularmente pa e meta pa informa y educa comunidad, cual ta algo cu semper mi a para pe, brindando prensa e accesibilidad pa entrevista! Di e forma aki reconociendo prensa como e di 4 poder cu ta percura pa ta critico riba desaroyonan den sociedad!” el a sigui bisa. Prensa na su turno a gradici e mandatario pa su acesibilidad semper, aunke cu varios biaha (incluyendo e portal aki) tabatin discusionan fuerte riba e maneho di noticia, y cu e acesibilidad no obstante tur critica, tabatey semper.