Stichting Parkietenbos ta keha di holor malo y gas di Ser’i Teishi

ORANJESTAD -  Holor malo y gas di Ser’i Teishi ta sigui afecta bida di habitantenan. Asina e fundacion di Parkietenbon ta bisa den un comunicado diamars. Segun e fundacion, mas di dos siman despues cu expertonan di exterior a bishita Ser’i Teishi pa asisti Serlimar pa remedia e situacion cu a surgi cu e deramento di e envirobales, ainda keto bay holor malo y posibel gasnan toxico ta afectando e habitantenan di e besindario. Stichting Parkietenbos tin cu enfatisa cu nunca antes e habitantenan a pasa den un situacion asina manera cu ta pasando actualmente.  For di marduga y mainta trempan e habitantenan no por hala rosea di aire limpi, bo rosea ta wordo corta y bo ta ansha y haya tosamento y dolor di cabes. 

SITUACION ABNORMAL

Esaki ta un situacion abnormal cu tin cu wordo coregi mas pronto posibel segun e fundacion. Nan ta mustra cu e gasnan posibelmente toxico y holor putri ta baha for di Ser’i Teishi cu e biento y drenta e barionan di Mahuma, Buena Vista, Simeon Antonio y ta hasta yega na e Hotel nobo, Aeropuerto y Primavera. Antes ta solamente ora cu biento bolter bo ta tin sinti e holor di e dump di Parkietenbos, pero awor ta diferente; e holor malo y gas cu ta corta bo rosea di Seri Teish’I ta constantemente afectando e barionan. 

ACCION MASAL 

Stichting Parkietenbos ta desea di informa e habitantantenan cu pronto lo tin accion di firma masal pa asina pa exigi gobierno un solucion mas pronto cu ta posibel. Segun e fundacion, mester bin un solucion no solamente pa locual ta tumando lugar na Ser’i Teishi pero tambe pa e Dump di Parkietenbos y pa maneho di desperdicio aki na Aruba. 

HALA POLITICA UN BANDA

E fundacion ta haya cu politica y otro interesnan mester wordo poni un banda pa pone bida di e ser humano na promer lugar. Mientrastanto Stichting Parkietenbos a establece contact cu instancianan internacional y tambe na Hulanda pa asisti e fundacion den e lucha pa recupera bek e derecho humano di e ciudadanonan di e barionan pa por hala rosea di aire limpi.