Casonan legal lo tarda bashamento di ruina Bushiri Hotel abou

ORANJESTAD – Gobierno ta evaluando pa benta e ruina di Bushiri Hotel abou, awor cu a para tur negoshacion cu e grupo Southwest Development Horeca Group. Minister encarga cu turismo Otmar Oduber a confirma esaki den ‘Noticia Awenochi’ diaranson anochi. Segun e mandatario no ta conoci ki dia esey lo sosode ni den ki forma.  Un problema cu tin ta e casonan den Corte cu ta tumando lugar y cu lo sigui. E motibo di e casonan ta pa protesta e hecho cu awor gobierno kier 'claim' e garantia di 2 miyon dollar, awor cu e grupo no a 'cumpli'.  Esey por stroba e proceso di benta e edificio abou. Tin un mocion cu a keda aproba den parlamento,cu ta garantisa cu lo cumpli cu esaki (bentamento abou di e edificio) tambe E mocion ta bisa e.o. cu ta bisa cu unabes cu e grupo aki no keda cla, lo desaroya esaki den un beach publico. Y ta riba esaki gobierno ta deliberando y evaluando con pa hacie den e miho forma.  

E siman aki tabatin e prome caso sumario di e grupo Southwest den Corte contra gobierno, den e intento pa frena gobierno di claim. E caso a tuma lugar diamars ultimo y hues ta dicta sentencia 17 di december proximo. Cu un sentencia e dia ey, no kier men cu cos ta caba, pasobra ambos partido por apela esaki. No ta descarta e hecho cu por bin un 'bodemprocedure' cu lo por tuma su tempo. Tanten cu esaki no tuma lugar, y tur intento legal agota, gobierno no por sigui cu e plan pa benta e edificio abou. 

Unabes cu esaki keda cla, segun e mandatario, tin cu evalua con pa haci e parti di e bentamento abou di edificio, y pa haci esaki den e forma mas responsabel, mirando cu tin di haber cu asbest tambe, cu ta peligroso. Loke tambe ta importante, ta cu mirando e aglomeracion di hende riba e beachnan actual, y cu tur e problemanan cu esaki ta trece awor, un beach publico extra ta cay net bon. Segun e mandatario, tin basta problema cu turista, cu ta bin riba bapor crucero y cu kier usa e beachnan cu tin na hotel. Pero e hecho cu tin tanto turista, y cu e problemanan cu ya caba hotelnan ta confrontando cu cosnan cu no ta core bon (problema cu beach vendors, limitacion di facilidad), e beach publico extra aki ta cay net bon. E mandatario no a pone un fecha pa benta e edificio abou ainda, pero no ta descarta cu esaki por sosode despues di cambio di aña awor.