Scol Saludabel Aruba hopi satisfecho cu resultado di e siman di Training

ORANJESTAD - Grupo di trabou Scol Saludabel Aruba ta hopi satisfecho cu e resultado di un siman intensivo di training cu a tuma lugar di 25 pa 29 di november 2019. Dos profesional di Scol Saludabel di Hulanda, señora Monique Boonekamp y señora Muriel Weltens, a bin Aruba pa un bishita di trabou y duna diferente training. E siman tawata encera e.o. un bishita informativo na e tres ministernan y departamentonan concerni. Un total di 16 participante di 8 scol preparatorio y basico, a sigui e curso pa ‘Coordinador di Scol Saludabel’. E scolnan aki a inscribi nan mes y a cuminsa e proceso pa bira un Scol Saludabel. Ta trata aki di Paulus School, St. Dominicus College, Prinses Amalia Basisschool, St. Franciscus College, Mon Plaisir School ( preparatorio y basico), Scol Primario Kudawecha y Cacique Macuarima School. A tuma lugar tambe e training pa ‘Consehero di Scol Saludabel’. Akinan un total di 18 participante di diferente organisacionnan gubernamental y no gubernamental cu ta traha directamente cu scol, a sigui e training. E actividadnan di e siman a inclui tambe un bishita na diferente scol cu ta den e proceso pa bira un Scol Saludabel.