Jeroen Pauw ta stop cu su talkshow 'Pauw' pa 2020

AMSTERDAM – Conocido periodista Hulandes Jeroen Pauw ta stop su ‘talkshow’ Pauw aki dos siman. Asina e portal NOS ta raporta dialuna. E ta keda si cu e canal BNNVARA, pero a laga sa riba Instagram, cu na 2020 e ta bay haci otro cos. “Sin mesa of cu mesa, pero no den studio mas” Pauw ta laga sa. “Otro combersacionan y raportahe pero cu mas duracion y profundidad, envez di e ‘topico di dia’ of esun di siman. Mi tin hopi gana di esey, pero mi ta anhela tambe pa e ultimo simanan Pauw”.  E no ta disparse di e pantaya di anochi laat si. Den curso di otro aña e ta bay tambe como presentador di e programa Op1, cu ta keda transmit desde 6 di januari pa 10:30pm riba NPO1. Ademas dialuna a bira locutor di aña di Hulanda pa 2019. Un premio basta cotiza.

PAUW

Hunto cu Paul Witteman, Jeroen Pauw a cuminsa na 2006 cu e talkshow popular ‘Pauw & Witteman’. Esey a stop na 2014, cu a bira Pauw den September di e aña ey. Pauw a gana e premio  Ere-Zilveren Nipkowschijf, un premio pa un persona cu a haci hopi pa e mundo di television. 

TAYER

Pauw algun aña pasa tabata na Aruba riba invitacion di UNESCO y a duna un tayer pa un grupo di periodista local, pa asina nan por desaroya nan tecnica y siña mas aspecto di e periodismo internacional.