Sociedad local ASDC ta tuma trabou di TNO over na Aruba

ORANJESTAD –  E organisacion Hulandes TNO (Nederlandse Organisatie voor toegepast-natuurwetenschappelijk onderzoek) ta stop di funciona den su constelacion actual dia 19 di december proximo. Tabata un aña pasa (December 2018) cu Noticiacla.com a bin cu e primicia aki, cu despues TNO mes a confirma algun ora despues. Dialuna mainta gobierno y TNO a firma un acuerdo cu ta permiti un sociedad nobo ASDC tuma over den un forma simbolico. 

TNO TA BANDON ARUBA 

Na December 2018 e portal aki a bin cu e anuncio sorpesivo di  TNO Caribbean, basa na Aruba desde 2011 cu e ta bandona nos isla na 2019. Mientras cu inicialmente NoticiaCla a cita fuentenan cercano pa e noticia, pa merdia, e compania mes a confirma e noticia. Motibo duna ta cu e lo no ta rendabel financieramente, y como tal ta cuminsa limita e operacion pa fin di 2019 bandona Aruba definitivamente. TNO (Nederlandse Organisatie voor toegepast-natuurwetenschappelijk onderzoek) ta un instituto di investigacion. E meta di e instituto ta pa na nomber di gobiernonan y otro partido, aplica e conocemento cientifico y hinke den practica. Fuera di Aruba, tin un oficina di e instituto Hulandes na Brussel, Tokio y Toronto. 

FUTURODurante un conferencia di prensa dialuna mainta di gobierno, minister Rudy Lampe a informa cu pa un suma simbolico, TNO ta traspasa ekiponan di e facilidad pa e sociedad local, (maatschap) pa e grupo di 5 persona por sigui funciona cu nan trabou, pero a base diferente. Nan lo ta disponibel pa haci trabounan investigativo y lo enfoca riba tereno di energya, awa, mobilidad y desperdicio (waste), segun su representante na Aruba Gregory Ras. Director TNO Caribe Sjaak Loo a firma e traspaso pa e sociedad nobo aki y ta lamenta cu TNO den su forma actual ta yega na su final.