Brandweer: Extra atencion di mayornan pa nan yiunan ora cumpra y tira clapchi

ORANJESTAD - Fin di aña ta un temporada dushi, pero e por comberti den un temporada amargo den caso cu no pone atencion debido na peligernan, specialmente ora ta papia di clapchi cu por causa lesionnan hopi mahos y hasta morto. Chef interino di prevencion di bombero Frido Dirksz ta pidi extra atencion di parti di particularmente mayornan pa cu nan yiunan ora di cumpra y tira clapchi.

Dirksz ta boga pa un bon control ora di cumpra clapchi pa ta sigur cu e clapchi ta cuadra cu e mucha su edad y tambe pa percura pa lesa y sigui instruccionnan y tin bon supervision ora di tira clapchi. E instruccionnan tin informacion manera con pa cende y con pa paga e clapchi.

Paga tino riba e fecha di produccion di e clapchi, esaki ta hopi importante y tambe sigui e instruccionnan cu tin riba e paki di e clapchi, Dirksz ta pidi. Pa ley e instruccionnan riba e paki mester ta den un of mas di e tres idiomanan Papiamento, Spaño y Ingles. E ley aki a pasa na 2011 y den e beleid aki tin tur e rekisitonan pa bendedo y esun cu ta cumpra e clapchi.

E control di Brandweer ta consisti di check si tin suficiente salida di e luga cu ta bende clapchi y nan ta check tambe e ubicacion di e trailer of facilidad for di cual e klapchinan ta wordo bendi. E luga mester ta por lo menos cuater meter for di otro luganan y mester tin porta y bentana. Tambe e bendedo mester tin un aparato pa paga candela (brandblusser) y un slang conecta na tur momento pa si acaso tin cualkier incidente.

Un situacion di preocupacion cu tur aña ta sigui presenta ta cu e personanan/companianan cu ta bende clapchi no semper ta mantene rond di nan luga limpi. Esaki ta inclui kita tur yerba cu ta cerca pa evita cu esaki ta pega candela y, hopi importante, ruim op tur caha, papel, etc. rond di e luga.

Dirksz ta splica cu den e ultimo añanan, debi na awasero, Brandweer no a haya su mes cu incidentenan hopi grandi, pasobra no tin hopi mata y yerba seco compara cu algun aña pasa.

Brandweer ta pidi pa tur hende bay safe, tene cuenta cu tur e cosnan chikito cu por bira retonan grandi y hasta por resulta den lesionnan malo cu perdida di dede, man of hasta bida humano. Dirksz ta pidi extra atencion pa e tipo di clapchinan mas peligroso y cu ta presenta mas risico pa lesion, manera raket y night shell.

E containernan cu vuurwerk lo sali dia 27 di december for di Wela y e bendedonan mag di cuminsa bende asina cu nan ricibi nan mercancia. E oranan di benta ta for di salida di solo pa 9’or di anochi. Cuerpo Policial ta encarga cu control di luganan cu ta keda habri mas laat cu 9’or.