Premier Wever: Tin mas di 10 mil Venezolano ilegal na Aruba

ORANJESTAD – Mas di 2 mil Venezolano a pidi asilo politico na Aruba y tin mas di 10 mil Venezolano ilegal riba nos isla. Asina prome minister Evelyn Wever a confirma dialuna mainta na www.noticiacla.com. E mandatario a bisa cu esaki ta parti di e combersacion ‘entre otro’ cu el a tene cu embahador di Reino Hulandes na Caracas Norbert Braakhuis recientemente. Segun Wever na e portal aki, e suma cu el a menciona (10 mil ilegal Venezolano) ta uno 'calcula' pasbra no tin e cantidad exacto registra. "Dus pesey e ta un schatting", Wever a sigui bisa.  cifra ta un poco menos cu e 15 mil cu United Nations High Commissioner for Refugees ( UNHRC) a informa mundialmente den su documentacion cu ta circula internacionalmente.

ILEGAL

E cifra di ilegalnan na Aruba ta interesante, mirando cu ta un di e poco biahanan cu e cifranan ta keda menciona pa un mandatario local. Den pasado recien, instancianan manera UNHCR mes a raporta cu tin por lo menos 16 mil Venezolano ilegal riba nos isla (Refugiado), pero e cifra aki den pasado no por a wordo confirma pa e.o. gobierno. Fuentenan for di consulado Venezolano a disputa e cifranan aki semper tambe. Y ta recientemente durante un encuentro na Aruba cu e embahador di Reino na Caracas, cu e cifranan menciona a keda informa. Ora cu a puntra e mandatario dialuna mainta si enberdad e cifranan aki ta loke el a bisa, el a bisa cu si. 

DEPORTACION

Siman pasa ainda un grupo di 35 Venezolano indocumenta a drenta Aruba ora cu nan a keda intercepta pa Warda Costa di Caribe. Mesun momento 2 di nan a pidi asilo y 8 mas a pidi den curso di e siman ey. A resulta cu (manera cu e portal aki a raporta tambe) mayoria di esnan cu a yega Aruba, den pasado a pidi asilo caba y a keda deporta, y a bin bek ‘atrobe’ via forma ilegal ‘atrobe’. E siman ey mes, 30 di e 35 a keda deporta bek pa Venezuela, hunto cu 5 otro cu tabata wardando caba pa keda deporta. E otro 5 Venezolanonan lo keda deporta dentro di poco tambe, manera e portal aki a compronde. Potret ta di archivo di Noticiacla.com ora cu na comienso di aña a gara un grupo di 17 Venezolano indocumenta