Zozibini Tunzi di Sur Africa ta Miss Universo 2019

ATLANTA - Zozibini Tunzi (26) a keda corona como Miss Universo 2019 diadomingo anochi na Atlanta. For di comienso, el a bira un faborito despues di varios declaracionan fuerte cu el a haci durante e curso di e certamen. E ta un activista y hopi apasiona riba violencia basa riba e genero di sexo. Di tur e declaracionan haci, esun cu mas a resona, tabata su ultimo. “Mi a crece den un mundo unda cu un hende muher cu tin mi apariencia, cu mi color y mi tipo di cabey, nunca tabata considera pa ta bunita. Mi ta kere cu ta tempo pa esaki stop awe!”. Na di dos lugar a keda Madison Anderson di Puerto Rico y despues Sofía Aragón di Mexico,  . Ambos tambe candidatonan fuerte. Aruba su representante Dana Garcia, aunke a haya un mencion di referencia general di e anfitrion Steve Harvey, no a cay den premiacion e anochi ey.