Cu e meta pa controla presupuesto 2015, Aruba por haya otro KB

ORANJESTAD – Tin tur indicacion cu Aruba lo haya su di dos Koninklijk Besluit (KB of aanwijzing) den 6 luna di tempo. NoticiaCla.com a compronde cu e concepto di e KB ta cla pa wordo presenta den Conseho di Ministerio Reino diabierna awor na Hulanda. E meta di e di dos KB aki ta pa sigura cu (contrario na e biaha pasa), e biaha aki e presupuesto 2015 wordo controla for di comienso, y bira uno realistico for di un principio.

Segun informacion cu NoticiaCla.com tin, e KB lo nifica cu ‘historia’ lo ripiti y cu e presupuesto 2015 lo wordo ‘investiga’ pa CFT su secretariado atrobe, prome cu e por wordo trata y finalmente firma pa gobernador. Mara na esaki, ta bin e posibilidad cu Aruba lo por wordo mara na un colegio consultativo permanente manera cu tin na Corsou y St Maarten, envez di esun cu Gobierno di Aruba a propone, esta esun local, e Colegio Fiscal. Tur, pa evita cu ta uza e ‘nomber’ CFT.

E idea pa Aruba lanta su propio organo consultativo fiscal na 2016 (Fiscal Council), no por conta cu e ayudo di e Colegio di Supervision Financiero den su estado actual sin mas. Esaki CFT ta laga bisa gobernador di Aruba den un carta manda e siman aki, como parti di e resultado di e recomendacion pa firma e presupuesto 2014.

E Colegio Fiscal local, lo mester consisti di 3 miembro, di cual uno ta apunta pa Aruba, y uno di Gobierno di Reino Hulandes. E colegio aki tin cu duna conseho riba futuro presupuestonan di e pais. Banda di esaki, ta haci un proposicion pa e secretariado di CFT fungi como e consehero di e colegio, cu tin cu presenta un raport di experticio anual na e colegio.

CFT sinembargo ta di opinion cu e forma con kier pa e colegio fiscal local funciona, no tin suficiente forma independiente pa funciona. Pa por garantisa un operacion independiente, mester sigui henter e ciclo di proceso di presupuesto, hunto cu e norma y posibilidadnan pa sancion. Y como tal e mester haya e mesun caracter manera cu e ta sosode den resto di Reino (Corsou y St Maarten). Esey ta nifica cu e mester contene tur norma cu esun efectuando e control, por basa su mes ariba. Esey ta nifica pues, cu nan ta recomenda pa inclui Aruba den e proceso manera Corsou y St Maarten, pa medio di un ‘Rijkswet Financieel Toezicht’.