Miss Aruba a causa polemica cu video na Miss Universo

ATLANTA – Aruba su representante pa e certamen di beyesa Miss Universo e aña aki, Dana Garcia, ta hayando hopi fama, pero no e forma cu nos of e lo kier. Un video cu miss Colombia Gabriela Tafur a graba, ta ‘revela’ pa mundo cu Aruba su representante, di berdad ta un Colombiana tambe, naci na Bucaracamanga. Pero mas ta loke Garcia a declara, cu no a cay den bon tera esta cu e ta 100% Colombiano. Nada malo cu e declaracion ey, pero ta considera cu e momento y lugar no tabata apropia pa haci esaki, siendo cu bo ta represenatando Aruba y no Colombia.  E cos a bolter di tal forma cu Garcia a haye ta saca un video mesora pa pidi despensa y splica su mes miho. 

CURIOSIDAD

E noticia a gara atencion di e.o. e portal Colombiano LA FM, cu a traha un raportahe riba dje. Nan ta yame un ‘curiosidad’ unda cu ta mustra cu tin un ‘otro Colombiana’ cu tambe ta participa pero cu ta representa Aruba. Ta mustra cu e tin doble nacionalidad pero di origen Colombiana y naci eynan tambe manera indica caba. Loke mas a hala atencion, ta ora cu miss Colombia ta papia cune, riba video , Dana ta confirma cu un sonrisa cu e ta 100% Colombiano y a manda un saludo pa tur su Colombianonan. Riba su mes, nada malo, pero esaki sinembargo no a cay den bon gusto na Aruba. Ora cu miss Colombia ta puntre si e ta mitar Colombiano, debi na su doble nacionalidad, Garcia ta corigie y bise.. ‘No, 100% Colombiana”. “ "¿Cómo están todos mis colombianos bellos? (besos)", Dana ta bisa mientras cu e ta hari cu su colega candidate. Segun Tafur, el a ripara e curiosidad debi na e accento di Garcia, cu ta zona puro Colombiano. E raportahe ta bisa cu Dana Garcia ta papia 4 idioma y ta bin di mayornan Colombiano. Lesa e articulo completo y por wak e video tambe den e raportahe.