SIMAR: Legalisacion di Cannabis ta desastroso pa Enseñansa

ORANJESTAD – Sindicato di maestro SIMAR a manda un mensahe cla diahuebs afo, informando cu nan ta contra legalisacion di cannabis, y cu e ta desastroso pa enseñansa. SIMAR ta mustra cu enseñansa ta forma un parti crucial den e desaroyo y futuro di un pais. Pa por duna eseñansa riba un nivel halto y di calidad no por ta bou influencia di droga.

Investigacion psicologico ta demonstra cu uzo di Cannabis ta afecta e desaroyo y e fuctionamento di e celebro. Esaki ta causa influencia negativo riba e capacidad pa siña di un alumno.

Segun e sindicato e informacion cu nan tin ta cu Cannabis ta afecta e emocion di un alumno riba un manera negativo y ta baha su motivacion. Como educador nos sa con importante motivacion ta pa un alumno su desaroyo.

“Como directiva di SIMAR nos a aserca diferente instacianan cu tin di haber cu adicion na Aruba y diferente directivanan di scol. Nos a wordo splica cu nan ta wak un crecemento den cantidad di meldingen di alumno cu ta uza Cannabis” e comunicado ta sigui bisa.

Consultorio pa Asuntonan di Adicion (CAA) na Aruba a tuma nota cu e cantidad di grupo pa guia di alumno cu ta uza Cannabis ta birando mas grandi.

Fundacion Anti Droga na Aruba (FADA) ta constata ora di duna charla na diferente scol cu den e ambiente social di alumnonan tambe tin hopi uzo di Cannabis y esey tin como consecuencia cu alumno ta mira uzo di Cannabis como algo normal y no ta realisa e peligernan cu Cannabis ta trese cune.

Directivanan di scol ta splica cu nan no tin problema solamente cu alumno cu ta uza droga pero tambe cu alumno cu ta bende e droga. Hasta mester menciona cu e problema di Cannabis a yega na scolnan primario.

A base di tur e puntonan aki riba menciona, ta constata cu e uzo di Cannabis ta halto bou di alumnonan y cu ta birando mas alarmante. “ Pa medio di esaki directiva di SIMAR kier uni su mes na sindicato SPA riba e posicion di no na e legalisacion di Cannabis” e sindicato ta finalisa bisando.