Borchi di I LOVE ARUBA a haya su sitio permanente nobo

Posted on 12/5/2019 11:28 am AST | Updated on 12/5/2019 2:49 pm AST

ORANJESTAD – Un 9 siman despues cu a kita e borchi di ‘I LOVE ARUBA’ dilanti Bestuurskantoor, a pone e borchi na su lugar nobo permanente. E doño di e borchi, Omar-Steve Lejuez a bisa noticiacla.com diahuebs mainta cu e trabou inicial mester a tuma 6 dia, pero a dura 6 siman pa keda cla. “Nos a renob’e completo, cada pida hero cu ta riba e borchi ta nobo” Lejuez a bisa. A fortifica e borchi tambe cu ta haci’e hopi mas stabil cu antes. Y awo falta algun detayes di parti di DOW, pa e borchi keda cla completamente. Mesora por a nota turistanan probechando pa saca potret cu e borchi. Tin dos bapor crucero aden, cu ta dun'e un bunita 'backround' compara cu antes. Algo cu Lejuez tambe a angela p'e. 

BORCHI AMBOS BANDA

Un di e plannan tabata pa no solamente usa e borchi di parti dilanti, sino di parti patras tambe. Esey tambe a keda realisa, den un forma di ‘spiegelbeeld’, contrario na e borchi original unda cu e banda patras tabata wak solamente hero. “Aworakinan parti patras bo ta les’e den spiegelbeeld, pero e ta hopi nice. Bo por saca un selfie banda patras y bo ta mirror e y bo ta les’e tambe” Lejuez a sigui bisa. 

AFWERKING 

A gradici e cooperacion di DOW, y e minister encarga cu a duna cooperacion cu awor cu e borchi ta na e lugar nobo, lo bin klinker rond, luz eynan, y lo hala e palo di coco cu ta net dilanti di e borchi aworaki. “E fase di bay haci’e mas bunita ta bay cuminsa” Lejuez a bisa. No por a bisa cuanto tempo e ultimo parti lo ta, pero ta spera cu esaki lo ta mas liher posibel. Di parti di Lejuez, nan trabou ta cla. Algun potret di e borchi ta cortesia di Omar Steve Lejuez. 

  • Powered by SETAR