CAFt: Aruba ta cumpliendo cu e presupuesto pero no e protocol

ORANJESTAD – Gobierno di Aruba ta cumpliendo cu e liña di presupuesto 2019 pero no cu e protocol (firma cu gobierno di Hulanda riba supervision financiero). Asina e colegio di supervision financiero CAFT ta bisa den su reaccion di e raportahe di e di 3 cuartaal di Aruba, (UR 3). Den un carta di 7 pagina, e colegio ta repasa nan reaccion y ta comparti e dos puntonan menciona. 

CUMPLI  

Segun CAft, di un banda gobierno di Aruba ta cumpli cu e norma e aña aki, conforme presupuesto y cu debi na esey, e deficit lo yega na 0.6 miyon florin, cu ta conforme e deficit di 0% riba e Producto Interno Bruto (PIB.) A base di esey, e expectativa di CAFT ta cu pa 2019, pais Aruba lo yega e norma acorda di deficit maximo di 0.5% di e PIB. 

NO CUMPLI

Di otro banda, CAFt ta bisa cu gobierno no ta cumpliendo cu e protocol pasobra ‘ainda’ no a implementa e recomendacionan di e colegio pa e gastonan di personal presupuesto incluyendo e contribucion di doño di trabou, incluso e presupuesto interino di Sociaal Crisis Plan (IBSCP) pa e bira 479 miyon. “Y pesey, Aruba no ta cumpli cu e protocol”, Caft ta bisa den e carta. Lesa e carta completo AKI.