Crisis cibernetico di HOH a drenta su di 2 siman sin solucion conoci

ORANJESTAD – E crisis cibernetico di Hospital a drenta su di 2 siman sin solucion ‘conoci’,  y solamente cu anuncio di prolongacion di decreto gubernamental manera cu gobierno a anuncia diamars anochi laat. Mientras a prolonga e decreto gubernamental cu tres dia, niun informacion nobo no ta saliendo. No sa si a haya solucion ni temporal pa e aspecto di comunicacion interno,  si a paga e hacker, y si e situacion a plama. Tur pa motibonan di ‘seguridad’. Pues ta birando 6 dia cu ta maneha e situacion di e forma ey. 

CONSEHO

Segun un comunicado di gobierno diamars anochi laat, e ‘Team di Maneho di Calamidad Nacional’ despues di a evalua e situation a conseha premier Evelyn Wever Croes cu ta recomendabel pa mantene e maneho di e crisis cibernetico di Dr. Horacio E. Oduber Hospital por medio di prolongacion di e decreto gubernamental conforme e ley di Calamidad, pa e siguiente 72 ora. 

PODER DI DECRETO

E decreto gubernamental ta duna e Team di Calamidad Nacional e espacio necesario conforme ley pa mantene e crisis conteni y haci adaptacionnan necesario pa cu obhetivonan y maneho di e crisis. Wever Croes mes momento ta sigura cu e salud di pashent y salubridad publico ta garantisa pa cu Hospital y Aruba.