Trahadonan di Manrique Capriles a bay den accion

ORANJESTAD – Trahadonan di Manrique Capriles a bay den accion awe (diaranson) mainta, pasobra gerencia a informa nan cu no ta paga bonus e aña aki. E accion di 2 ora tin cu trece cambio den e postura aki y si no logra e obhetivo, e presidente di e  sindicato cu ta representa e trahadonan, esta Hubert Dirksz di  FTA a sigura cu lo intensifica e accion si mester. E sindicato ta kere cu e acto di gerencia ta un prome paso den loke mester por bira clausura di e lugar, manera cu a sosode na otro islanan manera Corsou. Esey por lo menos ta e señal cu nan ta hayando di coleganan sindicalista cu tabata representa e trahadonan eynan. 

SITUACION DIFICIL

E situacion di e compania segun FTA, ta dificil mescos cu na Corsou. Primordialmente e situacion economico na Corsou no ta mucho bon unda cu a tuma medida. Tin tur indicacion cu na Corsou lo reduci e operacion. Sinembargo na Aruba segun FTA, e compania ta funcionando bon, ta trahando bon placa y esun mas importante ta esun di farma, cu ta un bon negoshi. "Nos no ta mira ningun motibo cu e compania ta informa nos cu no ta paga bonus" e presidente a bisa. E trahadonan ta protesta riba e asunto, mirando cu pago di bonus ta parti di e CAO cu nan tin vigente. Ta trata di un suma di menos cu 100 mil florin cu tin cu paga na bonus, y ta papia te hasta di 50 mil florin. E bonus, lo mester a wordo paga otro siman, segun e presidente di e sindicato.