Varios di e Venezolanonan ilegal gara diadomingo a pidi asilo politico

ORANJESTAD – Un total di 10 Venezolano a pidi asilo politico e siman aki, di e grupo total di 35 cu a purba drenta Aruba diadomingo marduga pero cu a keda interecepta pa Warda Costa di Caribe. Informacion confirma cu Noticiacla.com tin, ta mustra cu ya na momento cu e 35 personanan a yega, 2 a pidi asilo politico diadomingo caba. E otro 8 personanan, a haci esaki diamars mainta na oficina di DIMAS. Tur esaki ta confirma. E 8 Venezolanonan a yega DIMAS cu polis, debi cu Guarda Nos Costa tabata ‘onderbezet’, pues polis a duna un man. Unabez na DIMAS, e 8 Venezolanonan a ‘ser scucha’, y awor tin cu warda e proceso cana su caminda. 

E CASO DIADOMINGO

Manera cu e portal aki a raporta caba diadomingo,e marduga ey radar di Wardacosta a detecta un boto drentando awanan territorial di Aruba. E Centro di Rescate (RCC) mesora a manda un patruya cu a logra intercepta e boto y a wordo treci steunpunt pa mas investigacion.  Abordo tabatin 35 persona masculino indocumenta di nacionalidad Venezolano. E capitan y su ayudante, kendenan a pone demas tripulacion nan bida na peliger door di a haci e biahe peligroso aki, a wordo deteni pa traficacion di hende. E demas tripulacion nan a wordo transporta pa Warda nos Costa.