CFT: Gobernador a firma pero Aruba mester mas medida ainda

ORANJESTAD / WILLEMSTAD – E hecho cu gobernador di Aruba a firma tanto e presupuesto 2014 di pais Aruba como esun adapta, no ta nifica cu Aruba ta ‘for di peliger’ ainda. Asina e presidente di CFT, Age Bakker ta bisa gobernador den un carta diaranson. E colegio di supervision financiero CFT ta di opinion cu mientras cu gobierno di Aruba a tuma paso den bon direccion, gobierno di Aruba ‘ainda falta’ mas medida pa por cumpli cu e recomendacionnan haci den e raport investigativo di CFT.

Loke cu a sosode pa e presupuesto di 2014, ta cu den liña grandi a sigui e recomendacionnan, cu a coregi e ‘fayonan’ nota den e presupuesto y a aumenta e grado di realidad di esaki. Como cu esey a sosode, CFT a recomenda pa gobernador firma esaki.

Loke falta ainda ta e bista plurianual (meerjarig), cu segun CFT no a wordo cubri suficientemente. Como tal no tabata posibel segun CFT pa ‘a base di e material presenta’ determina si e ta realistico of si e meta pa yega na un presupuesto cu surplus na 2018. Como tal CFT ta recomenda pa bin cu un medida mas simpel y miho manehabel, cu ta duna resultado mesora. Entre nan ta sugeri un aumento extra di e tarifa di BBO. Mientrastanto por traha riba ehecucion di e medidanan anuncia di e presupuesto, pa nan por reemplaza e medida (BBO temporal) ora cu esaki ta cla. (lesa e documento completo di CFT aki).