Doñonan di Wariruri kier prohibi entrada na companianan turistico

ORANJESTAD – E doñonan di e tereno Wariruri no kier pa turistanan tin acceso na e tereno. Por lo menos segun representante di e famianan doño di e tereno den un comunicado cu noticiacla.com a ricibi. Tamara Beaujon como nan respresenante, a manda un carta pa AHATA (cu tambe ta den poder di noticiacla.com)  unda cu nan ta informa cu nan ta pone un ‘orden’ na tur compania cu ta usa e area como un atraccion turistico, cu nan no lo no por haci esaki mas. Esaki ta inclui tur propaganda  cu companianan tin mencionando Wariruri como parti di nan actividad  turistico, pa sea pasa of para na e Baby Natural Bridge riab e propiedad no por haci tal, como cu dentro di poco, e intencion ta pa cera e propiedad pa tur vehiculo motoriza y cabay. Unico forma pa tin aceso ta na pia of bicicleta. Beajon a manda un carta tambe pa prensa internacional y tur otro instancia. 

ZIENSWIJZE

Mes momento a Beajon a manda un carta riba e aspecto di ‘opinion’, osea zienswijze riba e RPOV cu e splicacion cu esaki ta perhudica su persona y famia completo. E zienswijze ta duna ciudadanonan e oportunidad pa duna opinion riba e ROPV, pa despues gobierno tene cuenta cu esaki y of incorpora e cambionan den e ROPV si por. 

TERENO

Segun Beajon, su tata a cumpra e tereno (e baai di Wariruri) na 1966, cu e intencion di traha un paar di bungalows pa uzo den weekend y vakantie. E la te hasta laga pone un tanki di awa fresco pa ora pasa dia eynan. Despues cu a laga cera e caminda pa pasa den e tereno, a habri esaki bek (grenspolitie) den nomber di ‘algemeen belang’. Ora cu e tata a fayece na 2004, a haci e intento pa bende e tereno, pero esaki a keda obstaculisa pa DIP segun Beajon. Awor segun e ROPV, ta resulta cu e tereno ta bay cay bou di zona berde, y cu nada no por wordo traha mas ey riba, pero cu companianan priva si por sigui genera placa usando e aceso na e tereno mientras cu e famia mes no por haci nada. Y como tal nan ta protesta riba e punto aki.