DIP: Hopi hende a entrega nan ‘opinion’ riba e ROPV nobo

ORANJESTAD – Hopi hende a acudi na Dienst Infrastructuur en Planning (DIP) pa entrega nan ‘zienswijze’ osea nan ‘opinion’ riba e ROPV (Ruimtelijk Ontwikkelingsplan met Voorschriften)nobo. Un ROPV ta indica pa area, tereno, kico por wordo traha y na unda y na cua regla di construction mester cumpli cu ne. Asina director di e departamento, Haime Croes a bisa. E ta papia di mas of menos 35 zienswijze, entrega prome cu 11’or di dialuna mainta. 

RECORD

“Pa nos ta hopi hopi hopi bon mes, mirando cu ya nos a custuma caba cu diferente zienswijze (compara cu den pasado)” Croes a bisa. Ta premira cu e cantidad lo surpasa esun di e ROP anterior. Un zienswijze ta un opinion di comunidad riba un decisioncu gobierno ta tuma y nan entrega esaki pa gobierno tene cuenta cu ne. 

ULTIMATUM

E ultimatum pa entrega nan ‘opinion’ tabata 12’or y mei di merdia. Y di biaha diamars ta habri cu e ‘hoorzitting’ entre 4 pa 6’or di atardi. Na e zitting aki, tur hende cu a entrega nan opinion, por bin vocifera esaki riba e tema, of añadi algo mas. Dia 5 y 6 di December ta mainta di 9-11am tambe por haci esaki.