A logra recauda e suma necesario pa operacion di Hildward Croes

ORANJESTAD – E evento A Chant for Hope, a logra e meta di recauda e fondonan necesario pa e musico conoci Hildward Croes diadomingo ultimo. Cu un palabra di danki di parti di famia, e ruman homber Aldrich diaranson merdia a duna un update di e resultado di e evento, y a confirma cu a logra recauda 50.000 florin (40 mil na e evento mes y 10 mil via deposito via banco), cu ta un poco mas cu e suma proponi di 25.000 dollar. E suma ey lo wordo uza awor pa e operacion di lomba di Hildward na Colombia.

Un di e pregunta y critica cu a surgi durante y prome cu e evento, ta con bin ta pidi placa na pueblo, siendo cu e famia lo mester tin suficiente placa entre tur tio cu tianan, pa por paga e suma menciona. Un topico cu politicamente semper ta wordo hopi cuestiona pa loke ta famia Croes riba e tema di Friends and Family. Segun e ruman di Hildward, Aldrich, e la confirma cu e la tende e critica ey tambe. “Nos famia ta yudando, y lo sigui yuda” Croes a bisa. “Famia, mi mesun mayornan lo sigui yuda te unda nan por”. Pues no ta asina cu nan no a pone placa. E prima di Hildward, Guissette a manda tres danki pa tur esnan cu a presenta pa deposita placa, musiconan di e 26 banda cu finalmente a presenta, y e oracionnan cu a wordo haci pa recuperacion di salud di Hildward.

Pa loke ta e salud mes di Hildward, Aldrich Croes a confirma cu e tratamento pa cual e la biaha un siman pasa, tabata pa e tratamento di radioterapia, cu ta wordo cubri pa AZV. A uza e articulo 25 cu ta bisa cu por haci esaki den un otro pais cu normal, cu den e caso aki ta Corsou. A opta pa mande Colombia, mirando cu e mediconan eynan durante operacion anterior, a mantene un historial medico y conoce ‘e pashent’ miho. Pero AZV no ta cubri e operacion di lomba cu tin cu tuma lugar, y ta pesey mester a lanta fondo pa por haci e operacion di lomba. Despues di esey, tin ainda e operacion na Merca pa kita e resto di cancer cu lo por a plama, y esey lo wordo haci na Arizona, Merca.

E plan ta pa Hildward haci e tratamento necesario di radioterapia, y bolbe Aruba prome cu pasco. Asina cu aña habri, e lo mester biaha pa Merca. No ta conoci con e lo cubri esey pero segun e ruman Aldrich, ta tratando pa sigui genera fondo via e cuentanan cu a uza durante e evento di diadomingo. Ademas ta haciendo apelacion na comerciantenan pa medio di carta, pa nan tambe contribui. E foto ta di e momento di prensa di diaranson, unda tanto Aldrich y Guissette Croes tabata presente, hunto cu Melvin Garcia, cu ta forma parti di e organisacion cu a organisa e evento di A Chant for Hope.