Mary Joan Foundation agradecido na Meta Corp N.V. pa Cede MJF pa 10 aña

ORANJESTAD -  Mary Joan Foundation ta den reflexion profundo y den admiracion  di un trayectorio di 12 aña consecutivo  brindando servicionan cardinal na e comunidad di Aruba. Na unda 10 aña for di e Cede ubica na Sabana Blanco 8, den cura di Atco na Dakota. 

E 10 aña ta unicamente posibel door di e personanan valioso cu a tuma e iniciativa pa busca un luga y cu a tuma e pasonan real pa bati na porta di Meta Corp N.V.. Mary Joan Foundation ta bisa danki pa ta un simbolo importante. Un simbolo di un gran luchador pa tantisimo personanan cu tabata y ta den necesidad pa un sosten y apoyo.

Pa e 10 aña valioso Mary Joan foundation kier gracidi Meta Corp N.V. pa acepta e peticion. Nos ta gradici Meta Corp N.V. pa a kere den e esencia di Mary Joan Foundation, cual ta reconose e necesidad, conscientisa, guia, atende na tur esnan cu na un forma of otro a confronta e malestar di cancer na pecho.

Tin un expresion conoci cu ta bisa “si e murayanan lo por a papia...”, kico e lo conta? Lo e por conta un gran cantidad di experencianan, encuentronan, celebracionan, sesionnan di brainstorm, momentonan di preocupacion, logro, tristeza, alegria, tension y e espirito di vibrante di fe pa bay contra tur cos cu ta wanta e ser luchado y famianan abou. E lo conta con a y ta bringando pa mas logronan. Cede Mary Joan Foundation sa cu ta hopi a yega na e portanan, manera  e clientenan, famianan, amistadnan, boluntarionan cu a yuda na diferente momentonan, miembronan di directive anterior, presente y e futuronan, studiantenan, departamentonan di gobierno, NGO’s, establecimento den sector priva, instancianan exterior, donantenan di cabey y hopi mas. 

Mary Joan Foundation ta para keto y ta mira cu Aruba ta reconoce cu tin un espacio pa acudi pa haya apoyo. Un instancia chikito y humilde, pero cu ta trata cu loke tin y por.

Danki pa e confiansa Meta Corp N.V., no ta loke cu boso tin pero ta loke boso ta duna, sigur sumamente balora!