Warda Costa a intercepta boto cu 35 Venezolano yegando Aruba

ORANJESTAD – Un total di 35 Venezolano indocumenta a keda intercepta diadomingo marduga pa Warda Costa di Caribe y treci waf di Oranjestad. Vocero di polis Lito Laclé a confirma pa Noticiacla cu ta trata di un grupo di Venezolano di cual uno lo ta un dama. Pa 4:35am e melding a drenta cu a intercepta e boto, y pa 7’or ainda tabata atende cu nan na waf. Mientrastanto a compronde cu a transporta nan pa e centro di detencion di Warda Costa. No ta conoci si tin otronan cu si a logra drenta,y cuanto esey nan lo ta. Sa sosode cu hopi biaha ta gara un cargamento, mientras cu di otro banda ta sigui drenta otro, na otro caminda. Na Corsou mientrastanto diabierna ultimo a deporta no menos cu 80 Venezolano bek pa nan pais cu avion Conviasa, no obstante intento di ultimo ora di un grupo di abogado, cu a opta pa bringa esaki. Mes momento dos grupo di indocumenta a yega nos isla ruman tambe. E potret ta di archivo di Noticiacla di un otro captura di indocumenta, na waf di Warda Costa na Savaneta.