Comunidad di Aruba ta dividi riba fechanan pa tira di clapchi

ORANJESTAD - Aruba ta divide riba e idea si mester mantene e fecha di benta y tiramento di clapchi manera cu e ta, of cambie pa un dia so. Un encuesta chikito cu e portal aki a haci pa 3 dia largo, a mustra cu 54% di esnan encuesta kier pa mantene e situacion manera cu e ta, esta tira clapchi for di ora cu e benta cuminsa dia 27 di December mientras cu 46% ta pidi pa cambie pa tira clapchi riba solamente un dia, esta dia 31 di December y eventualmente tene un show grandi riba e dia ey. 

SITUACION

Esnan cu kier pa e sigui manera cu e ta, ta bisa cu ta trata di tradicion y contal cu e wordo haci responsablemente, no ta mira pakico mester cambia e fecha. E otro grupo, cu ta 8% menos cu esun mayoria, ta bisa cu mester tene consideracion pa entre otro mascotanan cu ta wordo afecta grandemente cu e situacion di clapchi. Tanto pa zonido como e peliger cu e clapchi ta presenta pa nan. Fuera di esey, tin hende cu no ta gusta e zonido duro di clapchi. Como tal ta opta pa tira clapchi (si mester) pa haci e riba un solo dia, esta 31 di December pa 1 di januari. Of prohibi clapchi completo y  laga algun instancia haci shownan professional pa wak. 

TRADICION

E tiramento di clapchi ta un tradicion unda cu sigur riba cambio di aña tin e custumber di tira pagara pa asina ‘core cu fuku’, sea cas of negoshi. A bira un custumber cu comercialmente, negoshinan ta haci un evento rond di esaki y riba e ultimo dia di aña (depende si e cay den siman of weekend), ta tira nan pagara y ta reta otro awendia ken tin e pagara di mas grandi y largo (esun cu mas tiro). Anochi, famianan tin e custumber pa tira un pagara dilanti cas pa core cu fuku bieu y habri aña diferente. E problema ta cu hopi hende ta cuminsa tira clapchi manera cu nan cumpra esaki dia 27 di December, y ta para te despues di 5 di januari di e siguiente aña pasobra mester haci esaki pa tres rey, siendo cu oficialmente e fecha ta 1 di januari cu ta e ultimo dia pa tira clapchi.