Richardson: Kier remedia proceso di haci denuncia na polis

ORANJESTAD – Debi na kehonan con pa entrega ‘keho’ na polis, ta evaluando un cambio den e proceso. Siman pasa Mando Policial a reuni Polisnan di diferente departamento pa intercambia ideanan y solucionnan pa e retonan cu ta existi den e procesonan relaciona cu tumamento di “aangifte” en general. Alto Comisario di Polis, mr. Adolfo “Dolfi” Richardson a splica cu ta un echo cu tin hopi keho riba e proceso di otorgamento di denuncia na Polis.

No solamente na Polis, sino henter e cadena hudicial falta miho coordinacion. Ta sinti tende tambe di expresionnan di desapunto di ciudadanonan cu a haci un denuncia, cu ora nan pidi pa informacion cu Polisnan no tin un contesta satisfactorio pa nan. Como tal reuni un grupo di mas di 30 Polis pa reuni riba e topico aki. E decision pa pone un sesion estilo “think tank” a bin di parti di Alto Mando di Cuerpo Policial, kendenan ta desea pa coleganan di diferente rango y departamento contribui y ta mas activo den e proceso di mehoracion di servicio.

Tradicionalmente decisionnan lo bin di Mando Policial pa e otro miembronan di Cuerpo Policial, pero entre otro den e caso aki, nan a dicidi di haci’e diferente “mirando cu aangifte ta e fundeshi di nos trabao, di nos proceso hudicial,” Richardson a comenta. Tin atencion pa e topico aki den su totalidad for di momento di tuma un denuncia te na conclusion di e caso y Cuerpo Policial ta trahando riba solucionnan y con pa hinca procesonan miho den otro di un forma cu esaki ta haya un sosten den Cuerpo Policial completo, asina e hefe di polis a conclui.