Hospital falta ainda pa restaura netwerk afecta pa hacking

ORANJESTAD – Dos dia despues cu gobierno a tene un conferencia di prensa urgente riba e caso di hacking na hospital Horacio Oduber, cosnan no ta manera nan mester ta ainda. Departamento di Salud y e team di calamidad mientrastanto ta indica cu mientras tin avansenan, ainda falta pa restaura e netwerk afecta pa e hacking. Fuera di esey, e silencio hermetico ta sigui. 

SPECULACION

Informacion cu e portal aki tin ta mustra cu posiblemente ta trata di un ayudo di paden, osea un ‘inside job’ parcial, pues hacker(nan) di pafo lo a hay ayudo di paden pa drenta e sistema. Expertonan riba e tereno aki a informa e portal aki cu afo, no tin mucho comentario (chatter) riba e topico aki, cu ta hopi inusual ora cu algo asina sosode di ‘pafo’. Esey ta indica cu e por ta un trabou di paden, manera nan a informa e portal aki.   

COMUNICACION

Segun e comunicado emiti diahuebs, e departamentonan concerni ta mustra cu ‘tin bon comunicacion entre Dr. Horacio Oduber Hospital y e Team di Calamidad y por reafirma cu e situacion di IT na Dr. Horacio Oduber Hospital ta controla’. Tambe ta bisa cu cada dia tin adelantonan grandi den e parti di IT pero ainda falta pa restaura e netwerk. 

EMERGENCIA

Pa es motibo aki ta pidi comprension di parti di usuarionan di Hospital pa si e caso no ta hopi urgente, pa preferiblemente bai dokter di cas pa evita cu mester warda hopi na Departamento di Emergencia.  Alaves e Team di Calamidad kier a recomenda tur instancianan pa revisa nan sistema regularmente y si tin mester di un “up-date” pa haci esaki mesora y asina proteha nan seguridad cibernetico. 

UPDATE

Lo keda mantene comunidad di Aruba na altura di cualkier evento relaciona cu e topico aki regularmente pa evita cualkier inconveniencia.