Caso di hacking di hospital a bira noticia internacional

ORANJESTAD/ DEN HAAG – E noticia di hacking di sistema di hospital Horacio Oduber a yega rednan internacional. Y awe e ta riba e corant Hulandes De Telegraaf cu e cabez: Hackers leggen ziekenhuis Aruba plat. Esey tin consecuencia cu e la plama internacionalmente caba dunando Aruba mal nomber riba e tereno aki. No ta conoci ainda ki otro efecto esaki por tin, y si e por tin consecuencia si e noticia aki plama na Aruba. sigur no si no sa ki efecto e por tin riba pashentnan y nan datonan. Manera ta conoci, diaranson anochi laat gobierno a tene un conferencia di prensa pa anuncia cu nan a activa e ley di calamidad pa asina duna espacio pa por actua mas liher si e situacion rekeri esey. A admiti cu mientras cu e situacion awor ta uno di crisis, e no ta un calamidad ainda. Di otro banda, no kier a confirma e gravedad y mas detayes. 

HACKER

Loke e portal aki por a compronde ta cu enberdad tin un of mas hackers cu lo a sea internamente of externamente, inflitra e sistema di computer di hospital, y a encripta esaki di tal forma cu nan so tin aceso na e dato crucial di hospital. Tambe a confirma cu e hackernan ta demandando un suma cu mester wordo paga, sino por escala e situacion actual y cu tin un ultimatum cu a pone pa e pago tuma lugar. No por a haya kico e ultimatum ta, pero ta papia di 72 ora cu e crisis aki ta core, y como tal, por bien ta cu dentro di 72 ora e situacion por conoce un otro nivel.