A activa ley di calamidad pa atende cu crisis cybernetico na hospital

ORANJESTAD – E crisis cybernetico recien na Hospital Horacio Oduber a yega un nivel mas halto diaranson cu a pone cu gobierno a tene un conferencia di prensa urgente diaranson anochi laat, y informa cu gobierno a opta pa activa e ley di calamidad cu ta autorisa esnan necesario pa actua segun e ley y maneha un plan di calamidad si ta necesario y si e crisis actual bira un calamidad. Minister presidente interino Otmar Oduber a sigura mes momento cu e salud di pashent y salubridad publico pa hospital y Aruba ta garantisa. Mientras cu admiti cu e situacion di e crisis a escala, no por bisa, ta ki efecto e crisis cybernetico lo tin y pesey e proximo 72 ora ta crucial.

EFECTO DI HACKERNAN DEN HOSPITAL 

Loke cu Noticiacla.com a compronde ta cu un persona of grupo di persona cu tin e abilidad tecnico di kibra y drenta den sistema di computer avansa, tin parti di e sistema di hospital como rehen y a menasa cu si no paga un suma di placa cuantioso den un cierto cantidad di dia of ora, cu hospital (y mas leu), lo sufri e consecuencia.  Mientras cu publicamente no por bisa esaki, esey ta e realidad cu tin aworaki, unda cu ta purbando di contene e situacion actual y evita cu e ta ‘escala mas grandi ainda’. 

ACTIVA LEY

Durante e conferencia di prensa, Oduber a confirma cu gobernador di Aruba Su Excelencia Alfonso Boekhoudt a firma e ley di calamidad, cu ta duna autoridad nan esnan necesario pa actua, y tambe tin acceso na cierto fondonan si esaki ta necesario. A opta pa traha ‘delanta’ pa asina purba evita cu na caminda por perde tempo si e situacion cybernetico ‘escala’, manera cu ta e posibilidad aworaki. 

HECHOS

Segun e documento cu e portal aki a haya den su poder di gobierno, ta bisa cu ‘a consecuencia di un kiebro externo (hacking) den e sistema di computer di hospital HOH, gran parti di e netwerk aki no ta acesible aworaki pa uso pa por presta e servicio necesario den hospital. Ta considera esaki como un calamidad, conforme e ley di calamidad (AB 1989 no 51). Tambe ta confirma cu Aruba no tin un plan di calamidad pa atende cu tipo di asuntonan asinaki, y cu ta necesario pa por combati e calamidad aki, ta necesario pa por ehecuta articulonan 11 te cu 18 di e ley di calamidad. 

KICO A SOSODE

Ta mas cu un siman caba cu ta conoci cu hospital dialuna siman pasa a keda afecta pa e atake cybernetico, cu e consecuencia menciona. For di e momento ey, tur e stakeholdernan tabata den reunion y accion pa purba atende cu e situacion. A tuma un decision a base di e situacion, cu lo eleva e situacion di e crisis cu tin na hospital. Durante e ultimo 72 ora, despues cu a kere cu a stabilisa e situacion na hospital, toch a haya confrontacion cu diferente motibo cu a keda discuti durante un reunion awe tardi laat, y a dicidi unanimamente, cu ta aplica e ley di calamidad. Hopi no por a wordo bisa pa asina contene e informacion sensitivo cu ta atendiendo cune. Loke ta haciendo aworaki ta pa evita cu si cos escala, cu e salud di hende por keda afecta. No ta descarta cu e situacion por escala.