SVb na Eagle ta wordo renoba y expandi pa entre 6 pa 8 miyon florin
ORANJESTAD (AAN) – SVb na Eagle ta bay haya un renobacion y expansion. Diaranson atardi Minister di Salubridad Publico Sr. Dangui Oduber a acudi na Banco Social di Aseguradonan (SVb) na Eagle pa anuncia e renobacion y expansion di e oficina. Segun e mandatario, a pidi director di Svb pa pone como prioridad pa percura pa Svb haya un edificio nobo y tambe renoba e edificio existente. Esaki ta hopi importante pa e trahadornan tin un espacio comodo pa por haci nan trabou. E trabounan di expansion lo inicia na maart 2020 y lo termina pa fin di aña 2020. E inversion di e expansion den su totalidad incluyendo muebleria y ekipo ta calcula di costa entre 6 pa 8 miyon florin y despues ta sigui cu e restructuracion di e edificio existente.
Gobierno na sindicatonan: Lo no legalisa cannabis recreacional
ORANJESTAD – Diamars Gobierno di Aruba a enfatisa un biaha mas, pa medio di un comunicado, cu lo no legalisa uzo recreacional di cannabis. Raiz di e comunicicado ta cu Gobierno a tuma nota cu algun sindicato y mas persona den comunidad ta reaccionando publicamente contra e intencion di Gobierno pero esaki ta basa riba malinterpretacion. Gobierno ta trahando riba legalisacion di cannabis medicinal y no recreacional.
Otmar Oduber a atende su ultimo reunion di CDM como minister
ORANJESTAD – Diamars mainta Otmar Oduber a atende su ultimo reunion como minister. Esaki pasobra manera ta conoci Oduber na september di e aña aki a anuncia su retiro di politica pa mas cu tur cos pone mas atencion na su salud y famia.
Sociedad local ASDC ta tuma trabou di TNO over na Aruba
ORANJESTAD – E organisacion Hulandes TNO (Nederlandse Organisatie voor toegepast-natuurwetenschappelijk onderzoek) ta stop di funciona den su constelacion actual dia 19 di december proximo. Tabata un aña pasa (December 2018) cu Noticiacla.com a bin cu e primicia aki, cu despues TNO mes a confirma algun ora despues. Dialuna mainta gobierno y TNO a firma un acuerdo cu ta permiti un sociedad nobo ASDC tuma over den un forma simbolico.
Premier Wever: Tin mas di 10 mil Venezolano ilegal na Aruba
ORANJESTAD – Mas di 2 mil Venezolano a pidi asilo politico na Aruba y tin mas di 10 mil Venezolano ilegal riba nos isla. Asina prome minister Evelyn Wever a confirma dialuna mainta na www.noticiacla.com. E mandatario a bisa cu esaki ta parti di e combersacion ‘entre otro’ cu el a tene cu embahador di Reino Hulandes na Caracas Norbert Braakhuis recientemente. Segun Wever na e portal aki, e suma cu el a menciona (10 mil ilegal Venezolano) ta uno 'calcula' pasbra no tin e cantidad exacto registra. "Dus pesey e ta un schatting", Wever a sigui bisa. cifra ta un poco menos cu e 15 mil cu United Nations High Commissioner for Refugees ( UNHRC) a informa mundialmente den su documentacion cu ta circula internacionalmente.
Gobierno no ta den e deliberacionnan entre CITGO y su trahadonan
ORANJESTAD - Gobierno no ta participle den e deliberacionnan entre CITGO y su trahadonan. Asina gobierno ta bisa den un comunicado diabierna. Gobierno (segun e comunicado) a tuma nota di e preocupacion y peticion di algun sindicato cu kier pa Gobierno tuma e trahadonan di CITGO over. Gobierno bao di e circunstancian actual, e presion di Conseho di Ministro di Reino via CAFT, no tin e posibilidad pa tuma ningun trahado over.
Gobierno a aproba decreto Decreto Gubernamental protegiendo 16 area na Aruba
ORANJESTAD - Gobierno a aproba decreto Decreto Gubernamental protegiendo 16 area na Aruba diamars den conseho di minister. Diaranson Minister Otmar Oduber tabatin e honor di por a firma conhuntamente cu Minister di Husticia e aanbieding pa e ley aki por cana su caminda pa yega na Gobernador y Raad van Advies, pa por finalmente firma esaki. Ta trata di un proceso di Landsbesluit (HAM), pues e no tin e proceso largo cu mester pasa Parlamento di Aruba.
Follow NoticiaCla
