No ta existi un ‘Parlamentario temporal’, manera cu MEP a anuncia

ORANJESTAD – Mientras cu partido MEP a informa dialuna ultimo (y cu prensa,- incluyendo Noticiacla.com -, a raporta tambe) cu e Parlamentario Luigi Bergen ta retira ‘temporalmente’ di su funcion pa ‘limpia’ su nomber di ta un sospechoso pa Ministerio Publico, e realidad ta otro. Investigacion cu noticiacla.com a haci, ta mustra cu nos leynan no  ‘conoce un Parlamentario ‘temporal’ y/of un retiro ‘temporal’ di un Parlamentario. Por lo menos no den e forma con e partido y sr Bergen a ‘bend’e’ cu comunidad. Ley conoce solamente ‘un parlamentario’, punto. “Bo ta sali na caminda, bo ta keda afor”, ta loke huristanan a splica e portal aki. 

SITUACION

Den e caso aki, Bergen a sigura comunidad cu e ta retira ‘voluntariamente’ mientras cu e ta ‘limpia’ su nomber di ta un sospechoso, esta cu e ta algo temporal. Y unabez cu esey ta cla, e lo bolbe Parlamento. Esey den teoria ta posibel. Pero no manera cu el a wordo bendi, como si fuera cu e persona cu ta bay sinta ‘na su lugar’ (tambe manera cu el a wordo bendi) esta Dairlaine Guedez ta legalmente obliga pa dun’e su lugar bek manera nada, estilo di ‘keinta banki’.  

E REALIDAD DEN PRACTICA

E realidad ta cu unabez cu un persona ‘reemplaza’ e lugar di e Parlamentario encuestion, e Parlamentario ‘nobo’ ta bira ‘doño’ di e asiento cu el a caba haya, pues Guedez den e caso aki. Si e persona cu a ‘concede su posicion, (den e caso aki Bergen) kier su asiento bek dado momento, esnan ‘prome cu ne riba lista di e partido, y tambe esun cu a bin den su lugar, mester bay di acuerdo cu esey. Pero nan mester coopera, incluyendo si tin otronan cu ta  prome riba lista cu bin na remarke. Garantia pues Bergen no tin cu e posicion tey den futuro, alomenos si lo anterior sosode  sea pa palabra of cu tin algo firma interno, lo tey pe. Y ni cu palabracion pasobra esey ta bayendo caba den direccion di kiezersbedrog. Asina e expertonan huridico a sigui bisa.  

DIFERENTE ENTRE MINISTER Y PARLAMENTARIO  

E diferencia cu un minister, ta cu e si por sali y drenta bek despues (locual a sosode den pasado na Aruba y na Corsou mas recien). Ministernan no ta ser eligi den eleccion, y nan funcionamento ta depende di confiansa di Staten. Si Staten no confia un minister, nan por bah’e. 

E SITUACION COMPLICA

E situacion pues por ‘complica’ si no tin acuerdonan bon cera entre e persona(nan) en cuestion y partido MEP. Y ni cu acuerdo legal, tin garantia cu e persona lo por bin bek. Esaki pasobra nos sistema legal, especialmente kiesverordening, no ta tene cuenta cu situacion asina tampoco, mientras otro motibonan pa un retiro mientrastanto di un Parlamentario si ta regla eyden.  Tur ta depende kico tur MEP a priminti Bergen, y kico Bergen a bay di acuerdo cu ne.