Hues ta dicta otro siman ken por organisa carnaval 2015 di Aruba

ORANJESTAD – Hues ta dicta otro siman si SMAC ta keda cu e permiso pa organisa carnaval 2015 of no. Diaranson atardi pa 2 ora largo abogadonan di tanto gobierno (representa pa abogadonan Lucy Peterson y Winifred Kloes) y SAC (Darin Crouch y Jonathan Steward) a debati otro den corte di LAR den intento pa convence e hues cu nan respectivo clientenan mester haya e permisonan otorga na nan. Den corte mientrastanto abogado di gobierno a confirma na hues cu e fundacion SMAC a sinta cu mando policial diaranson mainta y cu a wordo avisa cu SMAC lo ricibi su permisonan di gobierno mas tarda diabierna awor. Si huez dicidi otro, cos por cambia ainda otro siman.

INICIO

Na inicio di e caso (di LAR) gobierno a haya su prome sla, ora cu hues no kier a tende pa protesta riba e caso cu SAC a cuminsa. Abogado di SMAC (Milko Baiz) a te hasta mustra hues cu e no ta na altura di e asunto, riba cual huez a bisa cu e no ta kere esey, pasobra e asunto tabata ‘suficiente de media’ y cu tur hende ta na altura di kico ta kico. Cu esey huez a cuminsa e caso y duna palabra na abogado di SAC.

SAC

Abogado Steward a mustra cu henter e asunto ta draai rond di e hecho cu gobierno ningun momento por demostra con SAC a faya den mantene orden publico y trece e comunidad na peliger durante organisacion di e carnaval durante 48 aña. E argumento di gobierno cu no tin suficiente personal policial nunca tabata un problema. Un argumento mas cu e abogado a uza, ta e fenomeno di ‘chantage’. Ta como si fuera ta chantageando SAC door di bisa cu si SAC no organisa carnaval, gruponan di carnaval lo no organisa carnaval, y cu lo no tin musica tampoco. A toca e parti di gewoonterecht, esta e derecho adkeri door di a haci algo y haya algo varios aña sigui. Y ademas durante tur e añanan, nunca tabatin un issue pa nenga e permiso. “Pesey no por nenga SAC e permiso awor”. SAC a mustra hues cu nan tin urgencia pa sa kico ta kico, ya cu e tempo ta cortico. Y si ainda hues no ta convenci, tin e asunto di e fecha cu a pidi permiso. Aki abogado Crouch a mustra cu nan a pidi permiso for di dia 1 di september, siendo cu SMAC a haci esaki te fin di october. Crouch a recorda hues cu durnte temporada di eleccion ultimo, tabatin un debate riba dunamento di permiso pa tanto AVP y MEP pa un parada di auto. E dilema tabata cu tur dos tabata kier a haya e mesun fecha. Aki gobierno a dicidi cu esun cu a pidi prome, -cu tabata AVP-, ta esun cu ta haya e permiso. “Si gobierno ta consistente, nan lo haci mescos awor. Nos a pidi prome, y nos mester haya e permiso como tal” Crouch a sigui bisa.

GOBIERNO

Abogado Kloes a cuminsa su argumento cu un statement. “SAC is not the boss of carnaval” (SAC no ta doño di carnaval). E la presenta su argumento, citando un lista largo di supuesto kehonan cu lo tin riba e actuacion di SAC. Ultimo añanan tin hopi critica riba SAC su forma di organisa carnaval, uno bou di nivel, contenido malo, mal organisa, y e hecho cu a organisa carnaval semper, no ta nifica cu semper e mester haye. Grito di gruponan di carnaval a keda un asunto, unda cu nan lo kier tin un participacion mas democratico. E punto principal segun Kloes, ta un ‘magna carta’ osea un ‘brandbrief’ di maart di e aña aki, unda cu mayoria di grupo ta mustra nan malcontento pa cu e organisacion SAC. E resultado di e carta tabata cu si SAC organisa carnaval, e gruponan lo no participa y tampoco e fundacion MUSICA. E rol di minister y gobierno particularmente a wordo hopi subraya pa e abogado, unda cu a purba convence hues cu den un trayectoria largo y cuidadoso, a purba cana un caminda corecto y largo na beneficio di carnaval. “SAC no tin ‘alleenrecht’, esta e derecho unico pa organisa carnaval. SAC no tin den nan statuto cu e ta e unico cu por organisa carnaval” e abogado a sigui bisa. Y finalmente, a mustra cu ta considera e forma con SAC a pidi nan permiso ( un of dos dia despues cu e reunionnan entre partidonan a tranca) cu nan a core pidi permiso. “E tabata algo strategico, enves di ta abase di confiansa” Kloes a sigui bisa.

HUES

Un pregunta cu SAC no por a contesta claramente pa hues, (ni pa gobierno) ta pakico nan mester haya e permiso y no SMAC, fuera di cu semper nan tabatin e. Nan a bringa mas bien pakico SMAC no mester haye. Di otro banda, hues a hala atencion di abogado di gobierno, tildando hues di ta mucho meti den e proceso di organisacion di e carnaval. “Gobierno no tin e tarea di ta responsabel pa carnaval. Segun mi e no ta para den constitucion, cu e rol di gobierno pa nan ta asina serio envolvi den carnaval” hues a bisa. “Atende cu carnaval, no ta un tarea di gobierno”, hues a laga sa. Ademas, a puntra abogado di gobierno, kico lo pasa si dado caso SAC haya e permiso y no SMAC. “Mi por spera protesta y represaya di comunidad, violencia?” hues a puntra e abogadonan. Riba esaki ambos a mustra cu esey no lo ta e caso. Hues na final a bisa cu ta hopi cla cu no por duna tur dos un permiso, pues no por tin dos carnaval. “Mi tin cu dicidi pues cu ta sea SMAC of SAC tin cu haya e permiso” e hues a finalisa bisando. E la pone e fecha di 11 di december proximo, pa duna su veredicto. Mientrastanto, partidonan ta keda pendiente, y durante cual SMAC por tin su permiso pa e tempo ey. Esey ta si hues no kite for di dje, otro siman diahuebs. NOTA: Abogadonan di gobierno no a permiti nan nan potret wordo saca na salida for di Corte. Pesey NoticiaCla.com tin solamente potret di e grupo di SAC.