Minister Oduber contento cu sr Eduardo De Veer a reflexiona

ORANJESTAD - Minister Oduber ta contento cu sr Eduardo De Veer a reflexiona y realiza cu Gobierno tin un interes general pa sirbi. Asina e mandatario ta bisa como reaccion riba e ultimo conferencia di e presidente comisario di MetaCorp di siman pasa. Segun e mandatario, sano huicio y dialogo ta mas eficiente cu campañanan negativo.

META

“Meta mester keda e ciere di dump parkietenbos y landfill temporal di Seri Teishi, mientras ta crea un sanitary landfill duradero conforme un maneho di desperdicio di sushi sostenible”, asina e mandatario encarga cu Medio Ambiente a declara na su yegada di exterior den fin di siman. “Interesnan personal no ta e prioridad na e momentonan aki, y ta contento cu e director ehecutivo di Meta Corp tambe a compronde esaki awo”, e mandatario a sigui declara. 

REUNION SERLIMAR/ECOGAS

Tambe minister Oduber a splica riba e reunion entre Serlimar y EcoGas siman pasa, unda a papia riba e contract vigente y con lo extende esaki despues di december awo y bao cua condicionan nobo. E meta ta keda pa por traha hunto na un mihor bienestar di e comunidad. “E campaña negativo y ofensivo di parti EcoGas contra Serlimar y mi persona ta keda pa loke e ta, pami semper e bienestar di Serlimar como empresa y su empleadonan, como tambe e bienestar general di esnan cu ta biba den vecindario di Parkietbos y Aruba en general ta keda e prioridad”,   Oduber a sigura. 

E mandatario a mustra riba e hecho cu esey ta e meta cu e cambionan den e ley di Serlimar, osea garantiza ambos meta. Na final di dia esey ta loke ta konta. “No tin un gobierno individualmente cu por soluciona esaki su so, ta tuma henter un comunidad pa logra esaki y gobierno ta conciente di esaki y pesey ta sigi cana e caminda di dialogo entre tur gremio y gruponan pa logra e meta aki proponi” e mandatario a finalisa bisando.