Luigi Bergen a anuncia retiro temporal como Parlamentario

ORANJESTAD - Luigi Bergen a anuncia retiro temporal como parlamentario di MEP dialuna mainta. Segun Bergen, el a informa partido MEP siman pasa cu e kier entrega su retiro como Parlamentario, desde e momento cu el a bira un sospechoso, mientras cu un caso di dje ta andando ta andando y despues cu su inocencia wordo prueba, e por drenta bek den Parlamento. Pasobra tanto Luigi como henter partido MEP ta di opinion cu ora un Parlamentario bira sospechoso, e no por keda den Parlamento. Segun e partido, maske no tin ningun ley ainda cu ta stipula esey, partido MEP ta para pa integridad. Lider y Presidente di partido a honra e peticion di Luigi Bergen, y a pidi Luigi pa keda un tempo mas pa asina por regla su reemplaso, y pa Parlamento por trata e leynan mas importante cu mester trata ainda e aña aki. 

INTEGRIDAD

Segun e partido, cu esaki Luigi Bergen y partido MEP ta demostra kico ta realmente integridad den politica. Dia cu Luigi a bira Parlamentario, e no tawata sospechoso y hasta a presenta un declaracion di OM. MEP a bisa cu e ta condena e hecho cu Benny Sievinger ta sospechoso di corupcion serio y ta den Parlamento ainda manera nada no a pasa. E grado di sinberguenseria aki ta wordo rechasa pa henter comunidad y partido MEP ta demostra con pueblo di Aruba kier pa atende cu integridad.