Minister Romero ta sigura cu no a schors ningun hende di su oficina

ORANJESTAD – Den loke ta mustra di ta un clarificacion pa un asunto di un di su ex coordinadornan y actual parlamentario Luigi Bergen, minister Chris Romero diadomingo den un comunicado a ‘kibra silencio’ oficialmente riba e asunto. “Minister di Transporte, Comunicacion y Sector Primario ta declara cu ningun personal di su bureau na ningun momento a wordo manda cas y/ of wordo geschors desde november 2017 te cu awor” e comunicado ta bisa. “ Esaki contrario na loke a sali publica den prensa na juli di e aña aki”, e comunicado ta sigui bisa. 

DEFENSA

E comunicado ta mustra cu e mandatario ta ‘sali na defensa’ di Bergen y of e kier sigura cu no tin ningun mal comprondemento riba e asunto di Bergen. Bergen tabata den media recientemente, unda cu tabata ‘indica’ cu e lo a keda suspendi di su funcion ora cu e tabata traha pa minister Romero na juli ultimo. Esaki pa supuesto asunto di maltrato den famia pa cual Romero lo a opta pa manda Bergen cas te ora cu caba investiga e asunto. Bergen a sali na su propio defensa varios biaha, sigurando cu ningun momento el a wordo suspendi y/of manda cas, y cu e ‘acusacionan’ ta sin base. Awe e mandatario en cuestion (Romero) a sigura cu enberdad ningun momento no a suspende ningun hende, pues incluyendo Bergen, aunke su nomber no ta wordo menciona. 

RUMOR

Mientrastanto Bergen ta keda den noticia, sigur momento cu diadomingo e portal di noticia 24ora a ‘indica’ cu Bergen lo retira e siman entrante di su funcion y cu e ex parlamentario Sue Ann Ras lo bolbe. Esaki den cuadro di un investigacion cu lo tin contra Bergen pa cual e partido lo a pidi Bergen pa retira mientras cu e investigacion aki ta canando.  Nada di esaki no ta confirma, aunke cu e portal menciona ta sigura cu el a haya confirmacion di e partido en cuestion, esta partido MEP. Pues cu esaki, e luz ta keda riba e parlamentario Bergen cu for di momento cu el a asumi e funcion di parlamentario, e luz ta riba dje, pero no di un forma positivo.