DAO: Encuesta riba nos yiunan di tera cu a caba studia y bolbe

ORANJESTAD – Departamento di Labor (Directie Arbeid & Onderzoek - DAO) ta pidi cooperacion di comunicado pa participa den e encuesta. E encuesta su meta ta pa haya informacion di e Arubianonan cu a gradua den exterior den e ultimo 15 añanan y cu a tuma e decision di regresa Aruba. 

E decision pa keda den exterior of regresa Aruba no ta un decision facil. Asina mes, hopi studiante ta opta pa keda den exterior. E encuesta su meta principal ta pa colecta informacion tocante e experiencia positivo y menos positivo durante proceso di regresa. Esaki lo por yuda identifica e posibel factornan cu lo por motiva e futuro graduadonan di afo pa regresa Aruba y tambe e lo identifica ki area e graduadonan kier wak mehoracion aden. 

CON POR YUDA?

E encuesta aki ta dirigi na e graduadonan Arubiano cu a gradua den exterior den e ultimo 15 aña. Ta posibel pa yena e encuesta si bo persona a gradua entre 2004 y 2019 den exterior. Ta importante pa remarca cu e encuesta lo keda anonimo y lo uza e datonan di resultado solamente pa e metanan di investigacion.  

E encuesta lo ta disponibel desde awe te cu 13 december 2019. 

Por yena e encuesta for di e siguiente link: 

https://forms.gle/QxCyeLy6GrGdDUN98

DAO ta solicita tur esnan cu ta cumpli cu e criteria, pa participa na e encuesta. Danki di antemano pa bo cooperacion. Pa mas informacion por yama 5237720 y pidi pa un empleado di Bureau Arbeidsmarktonderzoek of por manda nos un e-mail na julie.kelly@aruba.gov.aw of na returngraduates@gmail.com.