Simar: Minister no por elimina ‘zittenblijvers’ sin mas

ORANJESTAD – Sindicato di maestro ta contra plan di minister di Enseñansa Rudy Lampe pa ‘no tin mas zittenblijvers’ sin mas y den henter e liña di enseñansa. Tabata dia 20 di September ultimo cu e mandatario a saca e comunicado aki segun un comunicado di Directie Onderwijs di dia 13 di November. Sindicato di Maestro SIMAR a informa cu nan ta contra di e plan aki, pasobra e forma con e ta aworaki, no tin ‘rand voorwaarden’ pa e ‘idea di minister’ cana manera mester ta. 

REUNION CU MINISTER

Sindicato a sinta cu e mandatario luna pasa (3 di oktober), e mandatario a confirma e asunto di zittenblijvers. Simar a informe cu e ta un idea cu actualmente no por ta na Aruba, pasobra pa por hacie, mester tin e randvoorwaardennan, pa asina por duna e decision nobo un basis stabil pa wordo ancra. E mandatario a informa basicamente cu e decision ta tuma caba y cu el a manda e comunicado caba. Simar a mustra e ora cu nan no por sostene algo cu por bira negativo pa maestronan. Esaki pasobra e ‘regla nobo’ ta bay pone mas peso riba maestronan, cu nan tin actualmente caba. 

DIRECTIE ONDERWIJS

E sindicato a logra sinta cu directie onderwijs un luna despues, unda cu e departamento a informa nan cu e abolimento total manera cu minister kier, no ta posibel enberdad, pero ta bay wak con pa reduci e cantidad e zittenblijvers, y concientiesa e maestronan riba e parti di zittenblijvers. Esey sindicato ta haya bon, pasobra sikiera maestronan por sigui determina ki ora un mucha ta un zittenblijver of no. Tambe directie onderwijs a bisa di a sinta cu varios scol riba e tema aki. Simar a reitera cu no ta contra inovacion den enseñansa, contal cu e sosode di un forma responsabel y corecto, manera prepara e randvoorwaarden. Simar tambe a enfatisa cu nan no a firma ningun acuerdo riba e tema y a simplemente wordo informa. NOTA; E potret ta uno generico internacional y no un persona local y cortesia www.standaard.be. 

 .