Fundacion dedica na Padu Lampe kier registra cuadronan di Padu

ORANJESTAD - Fundacion pa Cultura na Honor di Padu Lampe tin e plaser di informa pueblo di Aruba cu otro aña, na april 2020, “Tata di Cultura” sr. Padu Lampe lo cumpli 100 aña cu poder di Dios. Relaciona cu esaki, E fundacion ta planea diferente actividad pa celebra e “Centenario di Padu”.

Un di e proyectonan ta publicacion di un bunita buki tocante e carera di Padu como pintor, cu historia, portret y descripcion di e cuadronan di Padu aden. E buki lo bai ta disponibel pa publico local y internacional. Pa motibo di esaki ta desea di registra mas tanto cuadro di Padu posibel, y ta suplica tur persona of organisacion – na Aruba of den exterior - cu tin un of mas cuadro di Padu, pa notifica di esaki mas pronto posibel. Por manda un mensahe via email na e adres special pa esaki, cu ta: jclampe2020@gmail.com.

Si ta posibel, ta pidi pa inclui den e email un portret di e cuadro, of cualkier informacion disponibel encuanto e cuadronan. Esaki por ehempel por ta e fecha, nomber di e doño, titulo, of kico e cuadro ta representa.

Ta conta cu cooperacion di e publico pa logra e publicacion valioso aki pa celebra e centenario di Padu optimalmente. Pa mas informacion por tuma contacto cu Fundacion Padu Lampe via email jclampe2020@gmail.com.