Gobierno a haya ultimatum nobo di sindicatonan pa indexering

ORANJESTAD – Sindicatonan SADA, SIMAR, SEPPA, SPA y TOPA a duna gobierno te cu diamars merdia otro siman pa reaccion of bin cu algo cu ta negociabel. Esaki riba e tema di indexering. Asina e vocero di e grupo, Eduard Maduro a bisa noticiacla.com diabierna mainta. E sindicatonan a informa nan miembronan diahuebs mainta, y a dicidi cu ta duna gobierno un ultimo chens. Si gobierno no bin cu algo ‘drechi’, lo tin consecuencia. Entre e problema cu e sindicatonan tin, ta e informacion incorecto cu gobierno lo ta dunando e comunidad. 

MENTIRA

Entre e ‘mentira’ ta cu gobierno ta bisando cu ta duna trahadonan publico 30 florin extra pa luna como oferta, pero en realidad e suma ta mucho menos y apenas 5.76 florin. Y asina gobierno lo ta bendiendo un plachi diferente. E sindicatonan ta bringando mas cu 8 luna caba pa logra convence gobierno pa paga nan indexering, pero gobierno na su turno a mustra cu nan no tin e forma awor, y ta purbando di acomoda e sindicatonan di un forma of otro, pero ainda partidonan no a logra haya otro.