Hulandesnan na Hulanda mester ta mas precupa cu nos na Aruba

ORANJESTAD – Hulandesnan mester ta mas precupa cu nos na Aruba, segun premier Mike Eman durante un conferencia di prensa riba e crisis constitucional actual. E mensahe Eman a manda pa periodistanan hulandes. E ta referi na e hecho unilateral cu un gobernante hulandes por haci y deshaci cu regla y statuut, na su antoho. Si esaki ta tipifica un gobernante hulandes cu su forma di anda, anto boso mester ta mas preocupa cu nos. Cu esaki e ta indica cu e accionan actual di gobierno hulandes, ta hopi peligroso, ora cu nan no ta respeta ley ni constitucion, contal cu nan haya nan gana.

SALUD

Riba e salud di e mandatario tambe tabatin hopi atencion. “Mi ta dispuesto pa muri pa e causa aki”. Premier Mike Eman a splica periodistanan hulandes. “Si mester, mi lo muri pa defende nos isla” tabata e contesta directo riba con leu e ta dispuesto pa bay cu e welga di hamber. Casi mei ora di preguntanan hopi directo di prensa hulandes, Eman a purba splica su situacion y motibo tras di su welga di hamber.

SMOKESCREEN

“E no ta un smokescreen” Eman a sigura un periodista, cu a puntra si e ta haciendo esaki pa tapa supuesto mal situacion financiero di e pais. Tambe e relacion personal entre su persona y premier Rutte, ta uno cu a hala atencion. Eman a mustra cu lo ta facil pa reacciona riba algo asina, pero loke si e ta tuma e mandatario y su gabinete na malo, ta e forma unilateral di tuma medida contra pais Aruba sin cu gobierno por haci algo bek.

APELACION

“Corsou a apela su aanwijzing. Abo tambe lo haci mescos enbes di welga di hamber?” . Aki Eman a sigura cu ta netamente esey ta e motibo di e welga di hamber pasobra Hulanda a frustra Aruba di tur e vehiculonan legal pa por apela y bringa e aanwijzing di un forma normal segun stipula den constitucion. For di e derecho di intern apel, pa otro vehiculonan di protesta, tur a wordo prohibi y rechasa di parti di Hulanda segun Eman.

FIA PLACA

Eman a wordo atendi riba su ponencia cu e no mester di placa di Hulanda manera cu e otro islanan a boga pe. “Si pero, Aruba kier si pa probecha di e 2% di interes pa prestamo internacional. Con bo ta splica esey” tabata un periodista su remarke mesora. Eman a sigura e periodista cu berdad Aruba por goza di e posibilidad ey, pero e ta simplemente un opcion, pero no e motibo cu awor tin problema entre Hulanda y Aruba. Localmente a keda estableci tambe segun Eman, cu pa por tin dialogo atrobe entre Aruba y Hulanda, mester deshaci di e KB (Koninklijk Besluit) di diabierna ultimo, sino no por papia.