Eduardo de Veer ta stop polemica cu minister riba ley di Serlimar

ORANJESTAD – Presidente-comisario di MetaCorp Eduardo de Veer diaranson merdia a anuncia cu di su banda, e lo stop e ‘polemica’ cu tin cu minister Otmar Oduber riba e tema di ley di Serlimar. Ta prome biaha cu de Veer ta papia publicamente riba e tema aki, y a hay’e ta hacie durante un conferencia di prensa cu mester tabatin como tema, e celebracion 100 aña MetaCorp. Cancela e conferencia, aunke si a pens’e, no tabata un opcion, pasobra lo a manda un señal robez. Ora cu nan a programa e conferencia siman pasa sinembargo, nan no tabata sa cu minister Oduber lo a tene su propio conferencia dos dia pasa y bisa tur loke el a bisa contra e.o. de Veer y MetaCorp.

LAGA ODUBER BAHA

“E homber ta bahando, kier men ami kier stop e polemica. Lag’e homber baha trankil” de Veer a bisa di minister Oduber cu ta poni pa retira dia 12 di December proximo. Mas specifico, de Veer a bisa cu MetaCorp lo no bay responde ariba e cosnan cu a wordo bisa dialuna door di e minister, den direccion di de Veer.  Loke si el a opta pa haci, ta ‘atende dos pa tres punto’ cu Oduber a trece dialuna ultimo y aclarea nan.  

RICK TIMMER

Un di e puntonan tabata riba un di e personanan cu a wordo menciona dialuna pa minister Oduber cu ta un di e directornan di MetaCorp, esta Rik Timmer. Y aki de Veer a opta pa ‘clear nomber di Timmer’. Segun de Veer, aunke cu enberdad Timmer (fuera di ta envolvi den directiva di MetaCorp) ta miembro di Raad van Advies, Timmer no a participa den e conseho cu a wordo traha pa e organo consultative riba e ley di Serlimar. Algo cu Oduber lo a acusa Timmer di ta si, pues indicando cu esaki ta conflicto di interes. “Mi kier laga esey bon cla, pasobra si ami no bis’e, Rik no ta bay bisa nada. Pero el a actua corectamente” de Veer a bisa, refiriendo na Timmer. 

CARIB MEDIA

De Veer a atende e parti tambe di e compania Carib Media cu ta pertenece na parlamentario Daphne Lejuez cu recientemente a bira independiente y cu a wordo fuertemente critica pa Oduber dialuna. Segun Oduber, Lejuez tabata traha asina pa de Veer su compania y como tal esey ta conflict di interes y pesey no por vota pa un ley cu ta perhudica companianan di de Veer. Carib Media ta di Lejuez y su casa, y Lejuez a bisa di lo a distancia su mes di e compania, aunke cu segun Oduber, ainda e ta registra na Camara di Comercio, como un di e doñonan. De Veer a haya ta necesario pa e clarifica e relacion di trabou tambe.  “E contract (entre MetaCorp) cu Carib Media ta core (pa)10 aña largo (caba), y e lo por core 10 aña largo mas padilanti. Er is niks aan de hand cu e cos ey” de Veer a sigura prensa diaranson. Ta trata segun de Veer, di 3 website cu e compania a traha, pa cual Caribe Media ta cobra 200 florin pa cada website pa luna pa mantene. Tabatin 3 berdad segun de Veer, pero esun di EcoGas a cancela su contracto 3 pa 4 aña pasa, pues no ta contracto cu ta cancela awor pa motibo di loke ta pasando awor. Pues asina de Veer a purba desbarata cu e lo ta empleando Lejuez y su compania y cu e lo tin influencia den dje.  

BAHA POLEMICA

“Mi ta pone nos reputacion na boso disposicion” de Veer a sigui bisa, refiriendo na e polemica cu tin. “Ban laga e minister bay trankil. Nos no kier duna fuel na un polemica innecesario” de Veer a bisa. “Ami kier manda un peticion pa nos hendenan di EcoGas y Ecotech y MetaCorp, pa baha e polemica. Mi ta haci mesun peticion na Serlimar, mi ta haci e mesun peticion na bosonan di prensa. Si nos traha hunto, tin solucionan hopi bon, bunita pa nos tur, pa henter e pais aki” De Veer a bisa. No ta cuestion si tin ganador of no. “Na final di cuenta, si bay bon pa Aruba, e ta bay bon pa MetaCorp. No ta posibel cu Aruba ta bay malo, y MetaCorp ta bay bon. Bo por wanta e cos ey un rato, pero a lo largo, e empresa aki a crece hunto cu Aruba”, de Veer a bisa. 

E CONFERENCIA

Na inicio di e conferencia pues, de Veer a admiti cu nan a haya nan cu un situacion cu e ‘timing’ di e conferencia. Ora cu nan a planea e conferencia, no tabata sa cu Oduber lo a tene su conferencia dos dia prome, y cu e temanan menciona. Pero manera indica caba, cancela e conferencia di prensa di MetaCorp cu e tema original e celebracion di 100 aña di MetaCorp, no tabata un opcion pero si kier a hacie (esta cancela). E tabata  realisa cu por a haya preguntanan skerpi di prensa riba e conferencia di prensa di dos dia prome di minister Oduber, cu a bay den atake riba De Veer y su companianan, relaciona cu e ley di Serlimar, y a atende e preguntanan tambe. “Si nos tabata sa cu ta bay tin e press conference dialuna, nos lo no a pone e press conference awe” de Veer a bisa. “Pero nos no por cancele pasobra esey ta manda un mal señal” de Veer a sigui bisa. Pues a dicidi di dal bay cune.