Aruba mercadea como ‘escape’ pa Mericanonan di e locura electoral

ORANJESTAD – Oficina di turismo, den loke ta un otro ‘gimmick’, ta ofreciendo turistanan potencial Mericano pa sali di e locura di eleccion presidencial Mericano y pa bin disfruta di e beachnan trankil di Aruba. A desaroya e campaña aki, pa asina haya e grupo Mericano cu no kier tin nada di haber cu e locura politico of cu kier un ‘trankilidad’ di tur esey, net prome cu e eleccion presidencial. Otro aña tin eleccion presidencial na Merca y segun ATA, aunke cu falta un aña ainda pa e eleccion, Mericanonan ta ‘ansioso’ caba no obstante ki direccion nan kier vota. Y aki ta unda cu ATA ta ofrece pa nan ‘desconecta’ y bin Aruba. 

OFERTA

Den cuadro di esaki, ATA a ofrece un pakete di edicion limita titular  Experencia di Desconeccion electoral pa Mericanonan cu tin stress y cu ta busca pa descansa y recarga nan baterianan prome cu nan deposita nan voto dia 3 di November otro aña. Entre e beneficionan, ATA ta ofrece propiedadnan oceanfront, liber di internet, esta ‘liber di e mundo digital’, ekipa cu asina yama ‘box den cual por warda nan telefon celular’, y asina ta completamente desconecta di e locura di eleccion. Sin internet, sin telefon, hendenan no por ta conecta mas y ta informa di locura electoral Mericano, segun ATA. Ora cu e turista book su biahe pa Aruba, e lo completa un encuesta simple, cu ta cataloga nan simptoma di nivel di stress politico. A cambio, expertonan di trankilidad lo provee un itinerario unico dedica na nan necesidad, incluyendo un consulta personal cu un concierge, cu lo guia e turista durante su jornada. E biahenan ta tuma lugar solamente na October di otro aña, pa asina Mericanonan por bolbe Merca na tempo na November pa deposita nan voto. Esnan cu registra awor, lo haya aceso di prioridad, ora cu e posibilidad di reserva, habri dia 2 di maart di otro aña. Esaki ta net prome cu e dia mas importa prome cu e eleccion, conoci como ‘super diamars’ cu ta e dia riba cual mericanonan ta duna un indicacion di ki direccion politico Merca lo kier bay.