Restriccion di buelo for di Venezuela afectando Aruba menos

ORANJESTAD / MAIQUETIA – Mientras cu e operacion venezolano pa ‘bringa droga y corupcion’ ta continua, e impacto cu e tabatin riba trafico aereo priva pa Aruba, a mehora. Si den fin di siman (diabierna y diasabra) no tabatin ningun avion priva aterizando for di Venezuela, esaki a cuminsa cambia poco poco. “Poco poco nan ta laga nan sali for di Venezuela” Claudio Stamper, director di Universal Aviation, a bisa NoticiaCla.com diamars mainta. Pa loke ta e operacion, consulado di Venezuela a confirma tambe cu esaki ta continua. “E operativo ta sigui su curso na 7 aeropuerto di e pais”, e representante a sigura NoticiaCla.com diamars merdia. “E operativo especial desplega pa nos gobierno, no a caba ainda”.

Segun Stamper, for di diadomingo a cuminsa mira ‘mehoracion’ poco poco. “Antayera mi tabatin 18 (avioneta) y ayera 26 (avioneta)” Stamper a sigui bisa. E ta ainda abou, pa un operacion cu normalmente ta mira entre 30 pa 40 avion pa dia den siman, y den fin di siman mas ainda. NoticiaCla.com a compronde cu hopi di esnan cu ta bin, ta pa atende cu nan asuntonan ‘financiero’ door di saca placa for di ATM, y otronan ta simplemente bin cu nan avionnan priva pa pasa un periodo di vacacion for di nan pais.

Tabata siman pasa cu Consulado di Venezuela a confirma e noticia di NoticiaCla.com di ciere di e aeropuerto di Maiquetia pa avionnan priva. Tabata trata di un operacion lidera pa vicepresidente ehecutivo venezolano, Jorge Arreaza, cu siman pasa diahuebs marduga a inicia na Aeropuerto Internacional Simón Bolívar de Maiquetía, estado Vargas e ‘ Operacion Cielo Soberano’ cu ta forma parti di accionan oficial contra corupcion y narcotrafico.

E operativo ta tumando lugar (ainda) na e siguiente 7 aeropuertonan: Aeropuerto internacional Simón Bolívar, Aeropuerto de la Chinita,en Maracaibo (Zulia, noroeste); Arturo Michelena, na estado Carabobo (Costa centro-norte); Santiago Mariño, na Nueva Esparta (Extremo noreste); José Antonio Anzoátegui, na Barcelona (Anzoátegui, noreste), Osacra Machado Zuloaga, conoci como aeropuerto Caracas, den Valles del Tuy, y e Aeropuerto Metropolitano na Charallave (Ambos den estado Miranda, sur di Caracas). "E procedimientonan aki, na prome lugar ta coresponde na e Instituto Nacional de Aviación Civil (INAC), cu ta inclui un revision integral di permiso di aeronavegabilidad: E ta implica un revision di tanto e avion, su permiso, sistema di mantenimiento, di su pilotos, licencia, y tambe su permiso di sobre vuelo".

E di dos tipo di inspeccion ta coordina pa e Oficina Nacional Antidroga ONA, "unda cu ta check tur compartimento di e avion incluyendo e parti electronico pa verifica e trazas de vuelo di e avion, pa verifica cu efectivamente nan ta cumpliendo cu e planes de vuelo". Durante e proximo oranan den e 7 aeropuertonan, ta prohibi salida di avionan mientras ta haci e revisionnan. Esnan cu no cumpli (avion y piloto) cu e reglanan lo haya medida contra nan tuma segun marco di e leynan aeronautica y venezolano.